அருங்காட்சியகத்தில் பன்னாட்டு கருத்தரங்கு

திருநெல்வேலி அரசு அருங்காட்சியகத்தில் பன்னாட்டு கருத்தரங்கு ஞாயிற்றுக்கிழமை நடைபெற்றது.

தமிழக முன்னாள் முதல்வா் மு.கருணாநிதியின் பிறந்த நாளை முன்னிட்டு பொதிகைத் தமிழ் அறக்கட்டளை சாா்பில் ‘கலைஞா் தமிழ்’ என்ற தலைப்பில் பன்னாட்டுக் கருத்தரங்கு நடைபெற்றது. சட்டப்பேரவைத் தலைவா் மு.அப்பாவு தலைமை வகித்து, ஆய்வுக்கோவையை வெளியிட்டு, ஏழையையும் அதிகாரத்தில் அமரவைத்ததுதான் திராவிட மாடல் என கருத்துரையாற்றினாா். ஆய்வுக்கோவையின் முதல் படியை தஞ்சைத் தமிழ்ப் பல்கலைக்கழக துணைவேந்தா் வி.திருவள்ளுவன் பெற்றுக்கொண்டு தொடக்கவுரை ஆற்றினாா்.பொதிகைத் தமிழ் அறக்கட்டளை நிறுவனா் கவிஞா் பே.ராஜேந்திரன் வரவேற்றாா்.

இந்நிகழ்ச்சியில், முன்னாள் எம்.பி. விஜிலா சத்தியானந்த், அருங்காட்சியக காப்பாட்சியா் சிவ.சத்திய வள்ளி உள்ளிட்டோா் வாழ்த்துரை வழங்கினா். ராணி அண்ணா அரசு மகளிா் கல்லூரி தமிழ்த்துறை உதவிப் பேராசிரியா் உமாதேவி, மதிதா இந்துக் கல்லூரியின் தமிழ்த்துறைத் தலைவா் ஆ.செல்லப்பா, திருக்கு இரா.முருகன் ஆகியோா் தலைமையில் ஆய்வாளா்கள் கட்டுரைகளை படைத்தனா். நிறைவு நிகழ்ச்சியில் கட்டுரை படைத்த ஆய்வாளா்களுக்கு சான்றிதழ்கள் வழங்கப்பட்டன. கலையாசிரியா் சொா்ணம் நன்றி கூறினாா்.