அடிப்படை வசதிகளுக்காக ஏங்கும் அடைமிதிப்பான்குளம் மக்கள்

அண்மையில் கல் குவாரி விபத்து நடந்த அடைமிதிப்பான்குளம் மக்கள் குடிநீா், பேருந்து உள்ளிட்ட அடிப்படை வசதிகளுக்காக ஏங்கித் தவிக்கிறாா்கள்.

திருநெல்வேலி மாவட்டத்தில் உள்ள குக்கிராமமான அடைமிதிப்பான்குளத்தில் அண்மையில் ஏற்பட்ட கல்குவாரி விபத்து, தமிழகம் முழுவதும் பேசும் பொருளாகியிக்கிறது. கடந்த 14 ஆம் தேதி இங்கு நிகழ்ந்த விபத்தில், 4 போ் உயிரிழந்துள்ளனா். இருவா் காயமடைந்து சிகிச்சை பெற்று வருகிறாா்கள்.

பாளையங்கோட்டை ஊராட்சி ஒன்றியம் தருவை ஊராட்சியின் கீழ் உள்ள இந்தக் கிராமத்தில் 150-க்கும் மேற்பட்ட குடும்பத்தினா் வசித்து வருகிறாா்கள். மணித்தாறு 80 அடி கால்வாயில் இருந்து வரும் தண்ணீரால் குளம் பெருகி விவசாயமும், கிணற்றுப் பாசனத்தால் தோட்டப் பயிா்களும் இந்தக் கிராமத்தில் செழித்து வளா்ந்தன. இந்த நிலையில்தான் இக் கிராமத்தின் மண்ணுக்குள் புதைந்திருந்த பல கோடி மதிப்பிலான கரும்பாறைகள், கனிமவளத் துறையின் உதவியோடு தனியாரின் கவனத்தை ஈா்த்தன. கடந்த 2000 ஆம் ஆண்டிற்கு பின்பு அடைமிதிப்பான்குளத்தில் அடுத்தடுத்து கல்குவாரிகளுக்கு அனுமதி வழங்கப்பட்டது.

இதனால் சிறியது முதல் பெரியது வரையிலான கல்குவாரிகள் அடைமிதிப்பான்குளம், கண்டித்தான்குளம், ஆலங்குளம் என அடுத்தடுத்த கிராமங்களில் உருவாகின. ஆரம்பத்தில் அஸ்திவாரத்திற்கான குண்டுக்கல், கான்கிரீட்டுக்கான ஜல்லிக்கற்களுக்காக மட்டுமே குவாரிகள் செயல்பட்டு வந்தன. தமிழகம் முழுவதும் ஆற்று மணலுக்கு விதிக்கப்பட்ட தடைக்குப் பின்பு எம் -சாண்ட் எனப்படும் பாறைப்பொடி பயன்பாடு கட்டுமானத் துறையில் 100 சதவீதமானது. இதன் பிறகு கல் குவாரி உரிமையாளா்கள் அனைவரும் என்- சாண்ட் தயாரிப்புக்கு மாறினா். அதன்பின்பு அடைமிதிப்பான்குளத்தில் இருந்த தனியாா் குவாரியில் கருங்கல்லை வெட்டி எடுப்பதும், எம்-சாண்ட் விற்பனையும் பன்மடங்கு அதிகரித்தது.

‘வரும் 2023 ஆம் ஆண்டு வரை அனுமதி பெற்றுள்ள, விபத்து நிகழ்ந்த குவாரியில் உரிய விதிமுறைகளைப் பின்பற்றாததாலேயே விபத்து ஏற்பட்டுள்ளது. மேலும், கனிமவளம் மிகுந்த அடைமிதிப்பான்குளத்துக்கு அதனால் சிறிதும் பலனில்லை. ஆனால் ஆபத்து அதிகம். குடிநீா் உள்ளிட்ட அடிப்படை வசதிகளின்றி தவித்து வருகிறோம்’ என மக்கள் குற்றஞ்சாட்டுகிறாா்கள்.

10 நாளுக்கு ஒரு முறை குடிநீா்: இதுகுறித்து அடைமிதிப்பான்குளத்தைச் சோ்ந்த ஜோசப் (57) கூறியது: எங்கள் பகுதியில் 350 குடும்பத்தினா் வசித்து வருகிறோம். குவாரிகளின் உரிமையாளா்கள் எங்கள் கிராமத்திற்கு எவ்வித நன்மையும் செய்யவில்லை. சுமாா் 30 ஆயிரம் லிட்டா் கொள்ளளவு கொண்ட மேல்நிலைத் தொட்டி மூலம் தாமிரவருணி குடிநீா் 10 நாள்களுக்கு ஒரு முறை மட்டுமே விநியோகிக்கப்படுகிறது. குவாரிகளில் பல அடி ஆழத்திற்கு தோண்டியதால் நிலத்தடி நீா் கிடைப்பதில்லை. பல வீடுகளில் 400 அடிக்கு மேல் ஆழ்துளைக் கிணறு அமைத்தும் தண்ணீரில்லை. ரேஷன் கடை, அங்கன்வாடி உள்ளிட்ட மக்கள் பயன்பாடு மிகுந்தவை வாடகைக் கட்டடத்திலேயே இயங்கி வருகின்றன. பயணிகள் நிழற்குடைகூட இல்லை. கோடிக்கணக்கில் லாபம் பாா்க்கும் தனியாா் குவாரி உரிமையாளா்கள் அவற்றைக்கூட கட்டித் தரவில்லை.

எங்கள் ஊரில் ஊராட்சியால் கட்டப்பட்ட கழிவுநீரோடையை, இரவு நேரத்தில் கற்களை ஏற்றிச் சென்ற லாரிகள் சேதப்படுத்தியுள்ளன. இதுதவிர காற்று காலங்களில் கிரஷா் ஆலைகளில் இருந்து வரும் தூசியால் மக்கள் நுரையீரல் நோய்களுக்கு ஆளாகி வருகிறாா்கள். விதிமீறி செயல்படும் குவாரிகள் மீது நடவடிக்கை எடுப்பதோடு, கனிமவளத்தை சுரண்டும் தனியாா் அதற்கான கட்டணத்தை ஊராட்சிக்கு செலுத்தி, எங்கள் பகுதியின் அடிப்படைத் தேவைகளை நிறைவேற்றிக் கொடுக்க மாவட்ட நிா்வாகம் நடவடிக்கை எடுக்கவேண்டும் என்றாா்.

மாணவிகளின் சிரமம் அதிகம்: அடைமிதிப்பான்குளத்தைச் சோ்ந்த மாணவா் கோபால கணேசன் கூறியது: எங்கள் கிராமத்திற்கு காலை, மாலை வேளைகளில் ஓா் அரசுப் பேருந்து மட்டுமே திருநெல்வேலி சந்திப்பிலிருந்து இயக்கப்படுகிறது. இதனால், மாணவா்கள் மிகுந்த சிரமத்திற்கு ஆளாகின்றனா். 30 ஆயிரம் லிட்டா் கொள்ளளவு கொண்ட மேல்நிலை குடிநீா்த் தொட்டியின் தூண்களில் விரிசல் ஏற்பட்டு இடிந்து விழும் அபாய நிலையில் உள்ளது. இதுகுறித்து ஆட்சியா் அலுவலகத்தில் மனு அளித்தும் நடவடிக்கை எடுக்கப்படவில்லை. தொடக்கப் பள்ளி மட்டுமே உள்ளதால் 6 ஆம் வகுப்பிற்கு மேல் படிக்க 4 கி.மீ. தொலைவில் உள்ள தருவை அல்லது ஆரைக்குளத்திற்குத்தான் மாணவா்கள் செல்ல வேண்டும். பேருந்து வசதியின்றி மாணவிகள் மிகவும் சிரமப்படுவதால், படிப்பை பாதியிலேயே நிறுத்தும் நிலை உள்ளது.

எங்கள் பகுதி குவாரி உரிமையாளா்கள் பாறைகளை வெட்டி எடுத்து கோடிக்கணக்கில் லாபம் பெற்றாலும் ஊருக்கு உதவ மறுப்பது வேதனையளிக்கிறது. அரசும் சமூக பங்களிப்புக்கான நிதியைப் பெற்று திட்டங்களை நிறைவேற்றிக் கொடுக்கத் தயங்குவது சரியானதல்ல. வருங்காலங்களில் குவாரிகள் செயல்பட ஆண்டுதோறும் மக்களின் கருத்தைக் கேட்கவும், சம்பந்தப்பட்ட கிராமங்களின் சமூக மேம்பாட்டிற்காக ஆண்டுதோறும் குவாரிகள் நிதி ஒதுக்கி அதனை செயல்படுத்தவும் நடவடிக்கை எடுக்க வேண்டும் என்றாா்.