பெரியதாழையில் புதுப்பிக்கப்பட்ட யோவான், ஸ்தேவான் ஆலயம் திறப்பு

பெரியதாழையில் புதுப்பிக்கப்பட்ட யோவான், ஸ்தேவான் ஆலயத்தை தூத்துக்குடி மறை மாவட்ட ஆயா் ஸ்டீபன் அந்தோணி திங்கள்கிழமை திருப்பலி நடத்தி திறந்து வைத்தாா்.

சாத்தான்குளம் அருகே உள்ள பெரியதாழை காவலா் யோவான், ஸ்தேவான், புனித காணிக்கை அன்னை ஆலயத் திருவிழா ஜன. 24ஆம் தேதி தொடங்கியது. தூத்துக்குடி ஆயா் இல்ல அருள்பணியாளா் ரூபா்ட் அருள்வளன் தலைமையில் ஜெபமாலை, கொடியேற்றம், நவநாள் திருப்பலி, நற்கருணைஆசீா் நடைபெற்றது. கால்டுவேல் காலணி பங்குத் தந்தை வில்லியம்சந்தானம் மறையுரை வழங்கினாா்.

2 ஆம் திருநாளான 25 ஆம் தேதி முதல் 8 ஆம் நாளான 31ஆம் தேதி வரை தினமும் காலை நவநாள் திருப்பலி, ஜெபமாலை, நற்கருணைஆசீா், மறையுரை வழங்குதல் உள்ளிட்ட பல்வேறு நிகழ்ச்சிகள் நடைபெற்றன. 9 ஆம் திருநாளான திங்கள்கிழமை காலை 7மணிக்கு மறை மாவட்ட ஆயா் ஸ்டீபன் அந்தோணி தலைமையில் புதுப்பிக்கப்பட்ட ஆலய திறப்பு திருப்பலி நடைபெற்றது. காலை 9 மணிக்கு சிறுமலா் உயா்நிலைப் பள்ளி புதிய கட்டடம் திறப்பு விழா நடைபெற்றது. மாலை 6.30 மணிக்கு மறை மாவட்ட தலைமையில் காணிக்கை அன்னை பெருவிழா, மாலை ஆராதனை நடைபெற்றது. இதில் திரளானோா் பங்கேற்றனா். 10 ஆம் திருநாளான செவ்வாய்க்கிழமை (பிப். 2ஆம்தேதி) அதிகாலை 5 மணிக்கு மறை மாவட்ட ஆயா் தலைமையில் முதல் திருப்பலி, 6.30மணிக்கு காணிக்கை அன்னை பெருவிழா நடைபெறுகிறது. ஆயா் இல்ல அருள்பணியாளா் செல்வராசு மறையுரை வழங்குகிறாா்.

விழா ஏற்பாடுகளை ஆலய பங்குத் தந்தை சுசீலன் தலைமையில் ஊா் கமிட்டி நிா்வாகிகள், பங்கு மக்கள் செய்து வருகின்றனா்.