தாமரை பூ, குங்குமம் கொடுத்து வாக்கு சேகரித்த பாஜக வேட்பாளா்!

தூத்துக்குடி மாநகராட்சித் தோ்தலில் 39 ஆவது வாா்டில் போட்டியிடும் பாஜக வேட்பாளா் உஷா தேவி, வீடு வீடாகச் சென்று தாமரை பூ மற்றும் குங்குமம் கொடுத்து வாக்கு சேகரிப்பில் ஈடுபட்டாா்.

சில நாள்களாக நூதன முறையில் பிரசாரம் மேற்கொண்டு வரும் இவா், சிவன் கோயில் தெரு, செல்விஐா் தெரு, வடக்கு ரத வீதி, பத்திரகாளி அம்மன் கோவில் தெரு, ரெங்கநாதபுரம், வ.உ.சி சாலை, கீழரதவீதி உள்ளிட்ட பகுதிகளில் வியாழக்கிழமை வீடுவீடாகச் சென்று வாக்காளா்களுக்கு தாமரை பூ மற்றும் குங்குமம் கொடுத்து வாக்கு சேகரித்தாா்.

அப்போது அவா், தூத்துக்குடி ரயில் நிலையத்தை மீளவிட்டானுக்கு மாற்றுவதற்கு நடவடிக்கை எடுப்பேன்; அனைத்து வீடுகளுக்கும் நல்ல குடிநீா் கிடைப்பதற்கு ஏற்பாடு செய்யப்படும் என வாக்குறுதி அளித்தாா்.

ஏற்கெனவே, தனது வாக்குறுதிகளை பத்திரமாக தயாா் செய்து விநியோகித்தது குறிப்பிடத்தக்கது.

பிரசாரத்தின்போது, பாஜக மாவட்டப் பொருளாளா் சண்முகசுந்தரம், கிழக்கு மண்டல பொதுச் செயலா் சௌந்தரராஜன், ஊடகப்பிரிவு மாவட்டத் தலைவா் பி.எம்.விக்னேஷ், மண்டலச் செயற்குழு உறுப்பினா் உலக முத்து சங்கா், தூத்துக்குடி தெற்கு ஒன்றிய செயலா் சண்முகசுந்தரம் உள்ளிட்டோா் உடனிருந்தனா்.