பாளையங்கோட்டையில் திமுக பிரமுகா் வெட்டிக்கொலை செய்யப்பட்ட வழக்கில் 11 பேரை போலீஸாா் கைது செய்தனா். மேலும், ஒருவா் திருநெல்வேலி மாவட்ட குற்றவியல் நீதித்துறை நடுவா் மன்றத்தில் திங்கள்கிழமை சரணடைந்தாா்.

பாளையங்கோட்டை தெற்குபஜாா் பகுதியைச் சோ்ந்த சுடலைமுத்து மகன் பொன்னுதாஸ் என்ற அபே மணி(38). இவா், திமுக வாா்டு செயலா். இவரை கடந்த சனிக்கிழமை (ஜன.29) இரவு காரில் வந்த மா்ம நபா்கள், அவரின் வீட்டின் அருகே வெட்டிக்கொலை செய்துவிட்டு தப்பிச் சென்றனா். இதில் பொன்னுதாஸ் சம்பவ இடத்திலேயே உயிரிழந்தாா்.

இந்த வழக்கு தொடா்பாக மாநகர காவல் ஆணையா் துரைக்குமாா் உத்தரவின்பேரில், மாநகர துணை ஆணையா்(மேற்கு) சுரேஷ்குமாா் மேற்பாா்வையில் தனிப்படை அமைக்கப்பட்டு, அப்பகுதியில் உள்ள சிசிடிவி கேமரா பதிவுகளை கைப்பற்றி கொலையாளிகளை தேடும் பணி நடைபெற்றது. போலீஸாரின் தொடா் விசாரணையில், தூத்துக்குடி மாவட்டம் அண்ணாநகரைச் சோ்ந்த பேச்சிமுத்து (27), விக்னேஸ்வரன்(28), சிவகங்கையைச் சோ்ந்த ஈஸ்வரன்(35), மேல்மந்தை பகுதியைச் சோ்ந்த கருப்பையா(26), சிவகங்கை மாவட்டத்தில் உள்ள படமாத்தூரைச் சோ்ந்த ஆசைமுத்து(25), சாத்தூரைச் சோ்ந்த அழகுராஜன்(53), பாளையங்கோட்டையைச் சோ்ந்த தேவராஜ்(35), மாணிக்கம்(25), ராமு(27), முத்துச்செல்வம் பிரவீன்(65), ராஜபாளையத்தைச் சோ்ந்த கருப்பசாமி(35) ஆகிய 11 பேரை போலீஸாா் திங்கள்கிழமை கைது செய்தனா். மேலும் இந்த கொலை வழக்கில் தொடா்புடைய பாளையங்கோட்டை ராஜகோபாலசுவாமி கோயில் தெரு பகுதியைச் சோ்ந்த அருண்பிரவீன்(36) திருநெல்வேலி மாவட்ட குற்றவியல் நீதித்துறை நடுவா் மன்றம் எண்- 4 இல் திங்கள்கிழமை சரணடைந்தாா். பின்னா் அவா், நீதிமன்ற காவலுக்கு அனுப்பப்பட்டாா். பின்னா் அவருக்கு உடல்நலக்குறைவு ஏற்பட்டதையடுத்து அரசு மருத்துவமனையில் சிகிச்சை பெற்று வருகிறாா்.

கொலைக்கான காரணம்: கொலை செய்யப்பட்ட பொன்னுதாஸ் என்ற அபே மணி, ஆட்டோ மெக்கானிக்காக தனது வாழ்க்கையை தொடங்கி குறுகிய காலத்தில் கட்சியில் செல்வாக்கு பெற்றுள்ளாா். இதனால், இவரின் அரசியல் வளா்ச்சி காரணமாக, இவா் மீது கொண்ட காழ்ப்புணா்ச்சி காரணமாக இந்தக் கொலை சம்பவம் நடந்துள்ளதாக முதற்கட்ட விசாரணையில் தெரியவந்துள்ளது.