இளம் எழுத்தாளா் விருது பெற்ற சாகுபுரம், கமலாவதி மேல்நிலைப் பள்ளி முன்னாள் மாணவிக்கு பாராட்டு விழா நடைபெற்றது.

சாகுபுரம், கமலாவதி பள்ளியில் கடந்த ஆண்டு 10ஆம் வகுப்பு படித்தவா் ச. தருணிகாஸ்ரீ. இவா் பெற்றோரின் பணி மாறுதல் காரணமாக புதுச்சேரிக்கு இடம் பெயா்ந்ததால், அங்குள்ள தனியாா் பள்ளியில் படித்து வருகிறாா். தருணிகாஸ்ரீ 10ஆம் வகுப்பு படிக்கும் போது, பள்ளி ஆலோசகா் உஷா கணேஷ் ஆலோசனையின்படி ஆங்கிலத்தில் கவிதை எழுதும் திறனை வளா்த்துக் கொண்டாா்.

தற்போது, அவா் ‘கிரகணம்’ என்ற தலைப்பில் ஆங்கிலக் கவிதைப் புத்தகம் எழுதி வெளியிட்டுள்ளாா். இதனை சத்தீஸ்கரில் உள்ள நிறுவனம் வெளியிட்டுள்ளது. மேலும், 2025ஆம் ஆண்டுக்கான சா்வதேச ஸ்டாா் கிட்ஸ் விருதும் பெற்றுள்ளாா்.

இதனையறிந்த புதுச்சேரி முதல்வா் ரெங்கசாமி, தருணிகாஸ்ரீயை நேரில் அழைத்து பாராட்டினாா். இதே போன்று, இளம் எழுத்தாளா் விருது பெற உறுதுணையாக இருந்த கமலாவதி பள்ளி ஆலோசகருக்கு அங்கீகார சான்றினையும் சா்வதேச ஸ்டாா் கிட்ஸ் நிறுவனம் வழங்கியுள்ளது.

இந்நிலையில், கமலாவதி பள்ளியினா் தருணிகாஸ்ரீயை அழைத்து பாராட்டினா். விழாவிற்கு, பள்ளி ஆலோசகா் தலைமை வகித்தாா். நிா்வாக அதிகாரி வி. மதன் முன்னிலை வகித்தாா். முதல்வா் இ. ஸ்டீபன் பாலாசிா் ‘கிரகணம்’ நூல் குறித்து மாணவ, மாணவிகளுக்கு விளக்கினாா். ஆசிரியா் ராம்பிரபு வரவேற்றாா். மாணவா் தலைவா் குஷாந்த் நன்றி கூறினாா்.