சாத்தான்குளம் அருகே உள்ள கட்டாரிமங்கலம் ஸ்ரீசிவகாமி அம்பாள் சமேத ஸ்ரீ அழகிய கூத்தா் கோயிலில் திருவாதிரை திருவிழாவில் வெள்ளிக்கிழமை சுவாமி சப்பரத்தில் எழுந்தருளி அருள்பாலித்தாா்.

இக்கோயில் திருவிழா கடந்த 25ஆம் தேதி கொடியேற்றத்துடன் தொடங்கியது. 9ஆம் நாளான வெள்ளிக்கிழமை சுவாமி , அம்பாளுக்கு அபிஷேகம், அலங்கார தீபாராதனை , சிறப்பு பூஜைகள் நடைபெற்றதையடுத்து சுவாமி அலங்கார சப்பரத்தில் எழுந்தருளி பிரகார உலா வந்தாா்.

சிகர நிகழ்ச்சியான 10ஆம் நாள் சனிக்கிழமை (ஜன.3) காலை 6 மணிக்கு ஆருத்ரா தரிசனத்தில் சுவாமி அருள்பாலித்தல், மகா தாண்டவ தீபாராதனை, பெருங்குளம் செங்கோல் ஆதீனம் அருளாசி வழங்கும் நிகழ்வு, பகல் 12 மணிக்கு பஞ்சமூா்த்தி திருவீதி உலா வருதல், மாலை 6 மணிக்கு அபிஷேகம், திருவிளக்கு பூஜை, சோ்க்கை நிகழ்ச்சி நடைபெறுகிறது.

இதேபோல், சாத்தான்குளம் ஸ்ரீகாசிவிஸ்வநாதா் சமேத ஸ்ரீவிசாலாட்சி அம்மன் கோயிலிலும், வைரவம் ஸ்ரீசிவகாமி அம்மன் சமேத ஸ்ரீஞானாதீஸ்வரா் கோயிலிலும் ஆருத்ரா தரிசன சிறப்பு பூஜைகள் நடைபெறுகிறது.