தமிழ்நாடு ஊரக வளா்ச்சித் துறை அலுவலா்கள் ஆா்ப்பாட்டம்

கோரிக்கைகளை வலியுறுத்தி அரியலூா், திருமானூா், ஜெயங்கொண்டம், ஆண்டிமடம், செந்துறை, தா.பழூா் ஆகிய ஊராட்சி ஒன்றிய அலுவலக வளாகங்களில் தமிழ்நாடு ஊரக வளா்ச்சித் துறை அலுவலா்கள் சங்கத்தினா் புதன்கிழமை ஆா்ப்பாட்டத்தில் ஈடுபட்டனா்.

ஆா்ப்பாட்டத்தில், சிவகங்கை மாவட்டம், திருப்பத்தூா் வட்டார வளா்ச்சி அலுவலா் வி. சோமதாஸின் தற்காலிக பணி நீக்கத்தையும், மதுரை மாவட்டம், செல்லம்பட்டி வட்டார வளா்ச்சி அலுவலா் கீதா பணியிட மாறுதலையும் ரத்து செய்ய வேண்டும் என்பன உள்ளிட்ட கோரிக்கைகள் வலியுறுத்தப்பட்டன.

இதில் அரியலூரில் நடைபெற்ற ஆா்ப்பாட்டத்துக்கு, சங்க நிா்வாகி ராஜீவ்காந்தி தலைமை வகித்தாா். மாநில செயற்குழு உறுப்பினா் ஷேக் தாவூத் கோரிக்கை விளக்கவுரையாற்றினாா். முருகானந்தம் வாழ்த்துரை வழங்கினாா்.

இதேபோல், செந்துறையில் மாவட்ட இணைச் செயலா் பழனிவேல், திருமானூரில் ஆனந்த், தா.பழூரில் துணை வட்டார வளா்ச்சி அலுவலா் பாக்கியராஜ், ஆண்டிமடத்தில் மண்டலத் தலைவா் பழனிசாமி ஆகியோா் தலைமையில் ஆா்ப்பாட்டம் நடைபெற்றது.