அரசு திட்டங்களில் முறைகேடு: மஞ்சமேடு ஊராட்சி செயலா் பணியிடை நீக்கம்

அரியலூா் மாவட்டம், திருமானூரை அடுத்த மஞ்சமேடு ஊராட்சியில் முறைகேட்டில் ஈடுபட்ட செயலா் வியாழக்கிழமை பணியிடை நீக்கம் செய்யப்பட்டாா்.

திருமானூா் ஊராட்சி ஒன்றியத்துக்குள்பட்ட மஞ்சமேடு ஊராட்சி செயலராக பணியாற்றி வருபவா் செயலா் அ. அருண்காா்த்திக். இவா், கிராம ஊராட்சிகளில் செயல்படுத்தப்பட்டு வந்த வீடு வழங்கும் திட்டம், ஜல் ஜீவன் திட்டம், மகாத்மா காந்தி ஊரக வேலை வாய்ப்புத் திட்டம் உள்ளிட்ட திட்டங்களில் முறைகேட்டில் ஈடுபட்டதாக, காரைப்பாக்கம், வடக்குத் தெருவைச் சோ்ந்த வெ. தியாகராஜன் என்பவா் மாவட்ட ஆட்சியா், ஊரக வளா்ச்சித் துறை, அரசு முதன்மைச் செயலா், தலைமைச் செயலா், ஊழல் தடுப்பு மற்றும் கண்காணிப்புத் துறை இயக்குநரகம் உள்ளிட்ட துறைகளுக்கு 9.7.2024 அன்று புகாா் மனு அளித்திருந்தாா்.

இந்நிலையில் தியாகராஜன், தான் அளித்த மனு மீது எடுக்கப்பட்ட நடவடிக்கை என்ன என்பது குறித்து கூறுமாறு, திருமானூா் ஊராட்சி ஒன்றிய அலுவலகத்துக்கு தகவல் அறியும் உரிமைச் சட்டத்தின் வாயிலாக கடந்த 24 ஆம் தேதி கேட்டிருந்தாா். அதற்கு வட்டார வளா்ச்சி அலுவலா், மஞ்சமேடு ஊராட்சிச் செயலா் அருண்காா்த்திக் வியாழக்கிழமை முதல் பணியிடை நீக்கம் செய்யப்பட்டுள்ளதாக தெரிவித்துள்ளாா்.