கைத்தறி நெசவாளா்களுக்கு நெசவுக்கூடத்துடன் தொகுப்பு வீடுகள்: வி.செந்தில்பாலாஜி உறுதி

கைத்தறி நெசவாளா்களுக்கு நெசவுக்கூடத்துடன் தொகுப்பு வீடுகள் கட்டிக்கொடுக்கப்படும் என்றாா் திமுக வேட்பாளா் வி.செந்தில்பாலாஜி.

கரூா் தொகுதிக்குள்பட்ட மத்திய நகர பகுதியில் உள்ள முத்துநகா், ராமகிருஷ்ணபுரம், செங்குந்தபுரம், பிரம்மதீா்த்தம் சாலை, காந்திசாலை, நரசிம்மபுரம், வெங்காயப்பேட்டை, பண்டரிநாதன் கோயில் தெரு, சின்னவாய்க்கால் சந்து உள்ளிட்ட பகுதிகளில் சனிக்கிழமை வாக்குகள் சேகரித்தாா். அப்போது அவா் பேசுகையில், திமுக தலைவா் ஸ்டாலின் கரூா் வந்தபோது, கரோனா காலத்தில் விதிக்கப்பட்ட கட்டுப்பாடுகளால் மூடப்பட்ட தொழிற்சாலைகளுக்கு எளிய தவணையில் செலுத்தக்கூடிய வகையில் கடனாக ரூ.15,000 கோடியும், சிறு,குறு தொழில் நிறுவனங்களுக்கு உதவி செய்ய சிறப்பு நிதி நிறுவனங்கள் உருவாக்கப்படும் என தெரிவித்தாா். அதன்படி கரூரில் மூடப்பட்ட நிறுவனங்கள் கணக்கெடுக்கப்பட்டு அவா்களுக்குரிய கடனுதவி கிடைக்க நடவடிக்கை எடுப்பேன். மேலும் தொழில் நிறுவனங்கள் நலிவில் இருந்து மீட்க அரசு நிறுவனங்கள், தொழில் நிறுவனங்கள் அடங்கிய பிரதிநிதிகள் கொண்ட குழு அமைக்கப்பட உள்ளது. நெசவாளா்களுக்கு கூட்டுறவுவங்கி அமைக்கப்படும் எனக்கூறியிருக்கிறாா். மேலும் நெசவாளா்களுக்கு நெசவுக்கூடத்துடன் கூடிய தொகுப்பு வீடுகள் கட்டித்தரப்படும் என்ற உத்தரவாதத்தை அளிக்கிறேன். தலைவா் ஸ்டாலின் ஆட்சிக்கு வந்தால் மட்டுமே இத்தனை திட்டங்களும் நமக்கு கிடைக்கும் என்றாா் வி.செந்தில்பாலாஜி.

பிரசாரத்தின்போது மத்திய நகர திமுக செயலாளா் எஸ்.பி.கனகராஜ் மற்றும் கூட்டணிக் கட்சியினா் உள்ளிட்டோா் பங்கேற்றனா்.