கிருஷ்ணராயபுரம் பள்ளிகளில் அமைச்சா் ஆய்வு

பள்ளிக் கல்வித் துறை அமைச்சா் அன்பில் மகேஸ் பொய்யாமொழி ஆய்வுப் பயணத்தின் கீழ் 186-ஆவது தொகுதியாக கிருஷ்ணராயபுரம் சட்டப்பேரவைத் தொகுதியில் உள்ள பள்ளிகளில் வியாழக்கிழமை ஆய்வு மேற்கொண்டாா்.

கரூா் மாவட்டம், கிருஷ்ணராயபுரம் சட்டப்பேரவைத் தொகுதியில் உள்ள அரசு பள்ளிகளில் பள்ளிக் கல்வித் துறை அமைச்சா் அன்பில் மகேஸ் பொய்யாமொழி வியாழக்கிழமை ஆய்வு மேற்கொண்டனா்.

கிருஷ்ணராயபுரம் ஊராட்சி ஒன்றிய நடுநிலைப்பள்ளி மற்றும் தொடக்கப்பள்ளியில் விரிவான ஆய்வு மேற்கொண்டு, ஆசிரியா்களின் கோரிக்கைகளை அமைச்சா் அன்பில் மகேஸ் பொய்யாமொழி கேட்டறிந்தாா். மேலும் மாணவா்களின் கற்றல் மற்றும் ஆசிரியா்களின் கற்பித்தல் குறித்து ஆய்வு மேற்கொண்டு, தொடு திரையின் வாயிலாக மாணவா்களுக்கு உயிரினங்களின் பெயா்களை சொல்லிக் கொடுத்தாா்.

தொடா்ந்து திறன்மிகு வகுப்பறைக்காக வரப்பெற்ற தொலைக்காட்சிகளை பாா்வையிட்டு, அதன் விபரங்கள் குறித்து கேட்டறிந்து அதனை விரைவில் பயன்பாட்டிற்கு கொண்டு வருமாறு அறிவுறுத்தினாா். மேலும், பள்ளியில் உள்ள கழிவறைகளை சீரமைக்குமாறும் மாணவா்களுக்காக வகுப்பறையில் இருப்பு வைக்கப்பட்டுள்ள மேஜைகள் மற்றும் இருக்கைகள் குறித்து கேட்டறிந்காா்.

ஆய்வின்போது, கிருஷ்ணராயபுரம் சட்டப்பேரவை உறுப்பினா் க.சிவகாமசுந்தரி உள்ளிட்டோா் உடனிருந்தனா்.