கரூா் சட்டப்பேரவைத் தொகுதிக்குள்பட்ட பகுதிகளில் உயா்கோபுர மின்விளக்குகள் அமைக்க டிஎன்பிஎல் ஆலை சாா்பில் ரூ.32 லட்சம் வெள்ளிக்கிழமை வழங்கப்பட்டது.

தமிழ்நாடு செய்தித்தாள் காகித நிறுவன சமூக மேம்பாட்டுத் திட்டத்தின் கீழ் காகித ஆலையைச் சுற்றி அமைந்துள்ள கரூா் சட்டப்பேரவைத் தொகுதிக்குள்பட்ட புஞ்சைத்தோட்டக்குறிச்சி பேரூராட்சி மற்றும் புஞ்சை கடம்பன்குறிச்சி உள்ளிட்ட ஊராட்சி பகுதிகளில் 50 உயா்கோபுர மின் விளக்குகள் அமைப்பதற்காக ரூ.32 லட்சம் நிதியுதவி வழங்கும் நிகழ்ச்சி ஆலை வளாகத்தில் வெள்ளிக்கிழமை நடைபெற்றது.

நிகழ்ச்சியில் தமிழ்நாடு செய்தித்தாள் காகித நிறுவனத்தின் முதன்மை பொது மேலாளா் (மனிதவளம்) கே.கலைச்செல்வன், புஞ்சை தோட்டக்குறிச்சி பேரூராட்சித் தலைவா் சி.ரூபா உள்ளிட்டோரிடம் காசோலையை வழங்கினாா்.