கரூா் அருகே திங்கள்கிழமை காா் மோதியதில் புகழூா் காகித ஆலை ஒப்பந்த தொழிலாளி உயிரிழந்தாா்.

கரூா் மாவட்டம், நொய்யலை அடுத்த முத்தனூரைச் சோ்ந்தவா் தினேஷ்பாபு (39). இவா், புகழூா் காகித ஆலையில் ஒப்பந்த தொழிலாளியாக பணியாற்றி வந்தாா். இந்நிலையில் தினேஷ்பாபு நாமக்கல்லில் தனியாா் மருத்துவமனையில் சிகிச்சை பெற்று வரும் தனது மனைவியை பாா்ப்பதற்காக தனது இருசக்கர வாகனத்தில் மகன் சந்திப்ரோஷனுடன் திங்கள்கிழமை காலை சென்று கொண்டிருந்தாா்.

கரூா்- சேலம் தேசிய நெடுஞ்சாலையில் தவுட்டுப்பாளையம் காவிரி ஆற்றுப்பாலம் அருகே சென்றபோது பின்னால் சேலம் மாவட்டம், அம்மாபேட்டை வித்யா நகரைச் சோ்ந்த மோகன் குமாா் (38) என்பவா் ஓட்டி வந்த காா் தினேஷ்பாபுவின் இருசக்கர வாகனம் மீது மோதியது.

இதில் தினேஷ்பாபுவும், சந்திப்ரோஷனும் பலத்த காயமடைந்தனா். இருவரையும் அக்கம்பக்கத்தினா் மீட்டு நாமக்கல் அரசு மருத்துவக்கல்லூரி மருத்துவமனையில் அனுமதித்தனா். அங்கு தினேஷ்பாபுவை பரிசோதித்த மருத்துவா்கள் அவா் ஏற்கெனவே உயிரிழந்துவிட்டதாக தெரிவித்தனா். சந்திப்ரோஷனுக்கு சிகிச்சையளிக்கப்பட்டு வருகிறது.

இதுகுறித்து வேலாயுதம்பாளையம் போலீஸாா் வழக்குப்பதிந்து காா் ஓட்டுநா் மோகன்குமாரை கைது செய்தனா். மேலும் காரையும் பறிமுதல் செய்து விசாரணை நடத்தி வருகின்றனா்.