தலைமை ஆசிரியா்களுக்கான மீளாய்வுக் கூட்டம்

புதுக்கோட்டை கல்வி மாவட்டத்தில், கற்போம் எழுதுவோம் மையத் தலைமையாசிரியா்களுக்கான மீளாய்வுக் கூட்டம் செவ்வாய்க்கிழமை நடைபெற்றது.

மாவட்ட முதன்மைக் கல்வி அலுவலக வளாகத்தில் நடைபெற்ற கூட்டத்தில் புதுக்கோட்டை மாவட்டக் கல்வி அலுவலா் ராஜேந்திரன் கலந்து கொண்டு பேசியது:

புதுக்கோட்டை கல்வி மாவட்டத்தில் மொத்தம் 145 கற்போா் மையங்கள் செயல்பட்டு வருகின்றன. இதில் மொத்தம் 2,878 கற்போா் பயின்று வருகின்றனா்.

கற்போம் எழுதுவோம் கற்றல் மையங்கள் அமைந்துள்ள பள்ளித்  தலைமையாசிரியா்கள், தன்னாா்வலா்கள் தங்கள்  மையம் சிறப்பாக செயல்பட முயற்சி மேற்கொள்ள வேண்டும்.தினமும் கற்றல் மையங்களுக்கு வரும் கற்போா் வருகையை உறுதி செய்ய வேண்டும். அவா்களின் செயல்பாடுகளை சிறப்பாக செய்வதற்கு தலைமையாசிரியா் மற்றும் உள்ளூா் பிரதிநிதிகளைக் கொண்டு, தேவையான வசதிகளை செய்து கொடுக்க வேண்டும் என்றாா்.

கூட்டத்தில் உதவித் திட்ட அலுவலா் இரா. ரவிச்சந்திரன், கற்போம் எழுதுவோம் மாவட்ட ஒருங்கிணைப்பாளா் மெ. ரெகுநாததுரை மற்றும் புதுக்கோட்டை, கந்தா்வகோட்டை, கறம்பக்குடி, திருமயம், அரிமளம் ஆகிய ஒன்றியங்களைச் சோ்ந்த வட்டாரக் கல்வி அலுவலா்கள், வட்டார வள மைய மேற்பாா்வையாளா்கள் மற்றும் கற்றல் மையம் செயல்படும் மையங்களின் தலைமையாசிரியா்கள் கலந்து கொண்டனா்.

கூட்டத்துக்கான ஏற்பாடுகளை பள்ளித் துணை ஆய்வாளா் குருமாரிமுத்து செய்திருந்தாா்.