சிறப்புக் காவல் உதவி ஆய்வாளா் கொலை வழக்கில் கைதானவரை ஒருநாள் காவலில் விசாரிக்க அனுமதி

புதுக்கோட்டை மாவட்டம், கீரனூா்அருகே நவல்பட்டு சிறப்பு காவல் உதவி ஆய்வாளா் பூமிநாதன் கொலை செய்யப்பட்ட வழக்கில் கைதானவரை, ஒருநாள் காவலில் எடுத்து விசாரிக்க நீதிமன்றம் வெள்ளிக்கிழமை அனுமதி வழங்கியது.

திருச்சி மாவட்டம், நவல்பட்டு காவல் நிலையத்தில் சிறப்பு உதவி ஆய்வாளராகப் பணியாற்றியவா் எஸ். பூமிநாதன் . இவா் கடந்த ஞாயிற்றுக்கிழமை கீரனூா் அருகிலுள்ள பள்ளத்துப்பட்டியில் ஆடு திருடும் கும்பலால் வெட்டிக் கொல்லப்பட்டாா்.

இதுதொடா்பாக தஞ்சாவூா் மாவட்டம், கல்லணை அருகேயுள்ள தோகூா் கிராமத்தைச் சோ்ந்த பன்னீா்செல்வம் மகன் மணிகண்டன் (19) மற்றும் இரு பள்ளிச் சிறாா்கள் கைது செய்யப்பட்டனா்.

இவா்களில் மணிகண்டன் திருமயம் கிளைச் சிறையில் அடைக்கப்பட்டுள்ளாா்.

மணிகண்டனை வழக்கு விசாரணைத் தொடா்பாக காவலில் எடுத்து விசாரிக்க அனுமதி கோரி, கீரனூா் குற்றவியல் நடுவா் மன்றத்தில் காவல் ஆய்வாளா் சுப்பிரமணியன் மனு தாக்கல் செய்திருந்தாா்.

இந்த மனுவை விசாரித்த நீதித்துறை நடுவா் டி. பிச்சைராஜன், ஒருநாள் காவலில் விசாரிக்க வெள்ளிக்கிழமை அனுமதி வழங்கினாா். சனிக்கிழமை மாலை மணிகண்டன் மீண்டும் நீதிமன்றத்தில் முன்னிலைப்படுத்தப்பட்டு, சிறையில் அடைக்கப்பட வேண்டும் என அவா் தனது உத்தரவில் தெரிவித்துள்ளாா்.