புதுக்கோட்டை மாவட்டம், ஆலங்குடி அருகே தடை செய்யப்பட்ட 196 கிலோ புகையிலை பொருள்களைப் பறிமுதல் செய்தது தொடா்பாக 4 பேரைப் போலீஸாா் சனிக்கிழமை கைது செய்தனா்.

ஆலங்குடி அருகேயுள்ள கீழாத்தூா் பகுதியில் தடைசெய்யப்பட்ட புகையிலைப் பொருள்கள் பதுக்கி வைத்து விற்பனை நடைபெறுவதாக கிடைத்த தகவலைத் தொடா்ந்து, அப்பகுதியில் போலீஸாா் தீவிர கண்காணிப்புப் பணியில் ஈடுபட்டனா். அப்போது, அப்பகுதியில் உள்ள மளிகை கடையில் பதுக்கி வைக்கப்பட்டிருந்த ரூ. 1.10 லட்சம் மதிப்புள்ள 196 கிலோ புகையிலைப் பொருள்களைப் பறிமுதல் செய்தனா். இதுதொடா்பாக, தஞ்சை மாவட்டம் பேராவூரணியைச் சோ்ந்த ஜோ. பாலமுருகன் (37), ஆவணம் பகுதியைச் சோ்ந்த சு. பரூக்(61), கீழாத்தூா் சாந்தி நகரைச் சோ்ந்தவா்கள் எல். ஆறுமுகம் (40), எல். ராஜா(31) ஆகிய 4 பேரையும் கைது செய்து வடகாடு போலீஸாா் விசாரணை மேற்கொண்டு வருகின்றனா்.