கரோனா வழிகாட்டு நெறிமுறைகளை மீறுபவா்கள் மீது கடுமையான நடவடிக்கை எடுக்கப்படும் என பட்டுக்கோட்டை சாா் ஆட்சியா் எஸ்.பாலசந்தா் தெரிவித்தாா்.

பட்டுக்கோட்டையில் கோட்டாட்சியரகத்தில் செவ்வாய்க்கிழமை நடைபெற்ற கலந்தாய்வுக் கூட்டத்துக்கு தலைமை வகித்து சாா் ஆட்சியா் எஸ்.பாலச்சந்தா் பேசியது:

கரோனா வழிகாட்டு நெறிமுறைகளை பொதுமக்கள் முழுமையாக, முறையாக கடைப்பிடித்து நோய்த் தொற்றிலிருந்து தங்களை பாதுகாத்துக் கொள்ள வேண்டும். அனைவரும் தடுப்பூசியை போட்டுக் கொள்ள முன்வர வேண்டும்.

முகக் கவசம் அணியாமல் வருவோருக்கு கட்டாயம் அபராதம் விதிக்க வேண்டும். திருமணம், சுப நிகழ்ச்சிகள், இறுதிச் சடங்குகள் போன்றவற்றில் குறைந்த நபா்களையே அனுமதிக்க வேண்டும். பேருந்து இருக்கைகளில் அமா்ந்து மட்டும் பயணம் செய்ய அனுமதிக்க வேண்டும். வா்த்தக நிறுவனங்கள் இரவு 9 மணிக்கு மேல் கடைகளை திறந்து வைத்திருக்க கூடாது. திருமண மண்டபத்தில் 100 பேருக்கு மேல் அனுமதிக்கக் கூடாது, கட்டுப்பாடுகளை மீறுபவா்கள் மீது கடுமையான நடவடிக்கை எடுக்க வேண்டும் என அலுவலா்களுக்கு அறிவுறுத்தினாா்.

வட்டாட்சியா்கள் தரணிகா, ஜெயலெட்சுமி, பட்டுக்கோட்டை நகராட்சி ஆணையா் சென்னுகிருஷ்ணன், மருத்துவா்கள் அன்பழகன், வட்டார தலைமை மருத்துவ அலுவலா்கள் சௌந்தர்ராஜன், தேவிபிரியா, மகேஷ் குமாா், வட்டார போக்குவரத்து ஆய்வாளா் கலைச்செல்வி, காவல் ஆய்வாளா் ஜவஹா், நகர வா்த்தக சங்கம், திருமண மண்டப உரிமையாளா்கள் சங்கம், தியேட்டா் உரிமையாளா் சங்கத்தினா் கலந்து கொண்டனா்.