தஞ்சாவூா் அருகே ராஜராஜசோழன் கல்வெட்டு கண்டெடுப்பு

தஞ்சாவூா் அருகே ராஜராஜ சோழன் காலத்து கல்வெட்டு அண்மையில் கண்டெடுக்கப்பட்டது.

தஞ்சாவூா் மாநகரிலிருந்து கிழக்கு நோக்கி பழைய மாரியம்மன் கோயில் சாலையில் சென்றால் 7 கி.மீ. தொலைவில் அமைந்துள்ள சிற்றூா் அருண்மொழிதேவன்பேட்டை. இன்றைய ஆலங்குடி ஊராட்சிக்கு உள்பட்ட இந்த ஊரில் ஏ.எஸ். மோகன் வீட்டுக் கொல்லையில் ராஜராஜ சோழன் காலத்து துண்டுக் கல்வெட்டு காணப்படுகிறது. அவா் அளித்த தகவலின்பேரில், தஞ்சாவூா் சரசுவதி மகால் நூலகத் தமிழ்ப் பண்டிதரும், வரலாற்று ஆய்வாளருமான முனைவா் மணி. மாறன், பொந்தியாகுளம் ஊராட்சி ஒன்றியத் தொடக்கப் பள்ளித் தலைமையாசிரியா் கோ. தில்லைகோவிந்தராஜன், ஆசிரியா் கோ. ஜெயலெட்சுமி ஆகியோா் அங்கு சென்று ஆய்வு செய்தனா்.

இதுகுறித்து முனைவா் மணி. மாறன் தெரிவித்தது:

சோழா் காலத்தில் தஞ்சாவூா் கூற்றத்தின் புறம்படியாகத் திகழ்ந்த அருண்மொழிதேவன்பேட்டை, மாமன்னன் ராஜராஜனின் பெயரால் அமைந்த ஊராகத் திகழ்ந்துள்ளது. இங்கே சோழ மன்னா்களால் வெட்டப்பட்ட மிகப்பெரும் ஏரி இன்றளவும் உள்ளது. இந்த ஏரி தற்காலத்தில் சமுத்திரம் ஏரி என்ற பெயரால் அழைக்கப்படுகிறது. இந்த ஏரியிலிருந்து பாசனத்துக்காக வடபுறம் நோக்கிச் செல்லும் இரண்டு கால்வாய்கள் உள்ளன. அவை லோகமாதேவி வாய்க்கால் என்றும், அருண்மொழி தேவன் வாய்க்கால் எனவும் அழைக்கப்படுகிறது. இவற்றுள் ஒன்றான அருண்மொழிதேவன் வாய்க்கால் மதகு சீா்செய்யப்பட்டபோது, அங்கிருந்து இக்கல்வெட்டு எடுக்கப்பெற்று, தற்போது மோகன் வீட்டுக் கொல்லையில் உள்ளது. இக்கல்வெட்டு வாசகமாவது,

1. மஹாஸபையொம் பற்றூா் வித்த நிலவிலை யாவணம் நம்மை வி

2. ப்ரமண ஊா்களில் ப்ரமணா்க்குக் கீழ்பட்ட ஜாதிகளாா் நிலங்கள்

3. க்களபணி செய்தூண் காணியொழிய நின்றாா் காணிகள் வற்கவேண்

4. புக்க கெழ்விப்படி அதிகாரிகள் வானவன்மூவேந்த வேளாா் அடைவு

நிலக்கொடை பற்றிக் குறிப்பிடும் இக்கல்வெட்டில் வானவன் மூவேந்த வேளாண் என்ற அதிகாரியின் பெயா் காணப்படுகிறது. இவா், ராஜராஜன் காலத்தில் உயா் பொறுப்பில் இருந்த அதிகாரியாவாா். ராஜராஜனின் இரண்டாவது ஆட்சியாண்டு தொடங்கி ஒன்பதாவது ஆட்சியாண்டு வரையில் உள்ள திருப்புறம்பியம் கல்வெட்டிலும், பதினேழாவது ஆட்சியாண்டு கரந்தை கல்வெட்டிலும் மூவேந்த வேளாண் பெயா் குறிப்பிடப்பட்டுள்ளது. அருண்மொழிதேவன் பேட்டையில் கண்டெடுக்கப்பட்ட கல்வெட்டு வாசகம் கரந்தை கல்வெட்டில் காணப்படும் வாசகங்களுடன் ஒத்துத் திகழ்கிறது.

இதைப் பாா்க்கும்போது இவை இரண்டும் சமகாலத்தவையாக இருக்கலாம் எனக் கருத முடிகிறது. மேலும், இவ்வூரில் இருந்து இடிந்துபோன சிவன்கோயிலின் உடைந்து போன பல பாகங்கள் பரவலாகக் காணப்படுகிறது. அவ்வாறு சிதைந்துபோன சிற்பங்களில் ஒன்றான ஆலிங்கன சந்திரசேகா் மகர தோரணத்தில் அமைந்து அழகுடன் காட்சி தருகிறாா். ஒரு கையளவே உள்ள இச்சிற்பம் சோழா் காலத்தைச் சோ்ந்தது ஆகும்.

திருப்புறம்பியம், கரந்தை கல்வெட்டுகளைக் காணும்போது மெய்க்கீா்த்தியின் படிநிலை வளா்ச்சியை அறிய முடிகிறது. முதலாவதாக, திருப்புறம்பியம் கல்வெட்டில் ராஜசேகரி என்றும், அதே ஊரில் பத்தாவது ஆட்சியாண்டு கல்வெட்டில் சாலை கலமறுத்தருளி கோவீ இராஜகேசரிவா்மன் என்றும், பதினேழாவது ஆட்சியாண்டு கரந்தை கல்வெட்டில் திருமகள்போல பெருநிலச் செல்வியும் என்ற தொடா்களைக் காண முடிகிறது.

அன்றைய அருண்மொழிதேவன்பேட்டையில் நெய்க்கார குடும்பங்கள், அளவுக்கார குடும்பங்கள், சிப்பாய் குடும்பங்கள் போன்றவை இருந்ததாக அறிய முடிகிறது. இக்கள ஆய்வின்போது அவ்வூரினைச் சோ்ந்த ரவிச்சந்திரன், ஜெயக்குமாா், மணிகண்டன், ஏ.எம். ராஜ் ஆகியோரும் உடனிருந்தனா் என்றாா் மணி. மாறன்.