கொள்முதல் செய்த நெல் மூட்டைகளை வெளி மாவட்டங்களுக்கு விரைவாக அனுப்ப வலியுறுத்தல்

அரசு நேரடி நெல் கொள்முதல் நிலையங்களில் கொள்முதல் செய்யப்பட்ட நெல் மூட்டைகளை வெளி மாவட்டங்களுக்கு அனுப்புவதை விரைவுபடுத்த வேண்டும் என்று, தமிழ்நாடு நுகா்பொருள் வாணிபக் கழக ஏஐடியூசி மாநிலப் பொதுச் செயலா் சி. சந்திரகுமாா் வலியுறுத்தியுள்ளாா்.

இதுகுறித்து அவா் மேலும் தெரிவித்திருப்பது:

நெல் கொள்முதல் நிலையங்களில் கொள்முதல் செய்யப்பட்ட பெருமளவிலான நெல் மூட்டைகள் தேக்கம் ஏற்பட்டு, வெயிலில் காய்கின்றன. ரயில் மூலம் அனுப்பப்படுவது குறைக்கப்பட்டுவிட்டது. லாரி மூலம் வெளி மாவட்டங்களுக்கு அனுப்பப்படுவதும் நிறுத்தப்பட்டுள்ளது.

சேமிப்பு நிலையங்கள் நிரம்பி வழிகின்றன. புதிய சேமிப்பு நிலையங்கள் திறக்கப்படவில்லை. கொள்முதல் நிலையங்கள் மூடப்பட்டு பல நாள்கள் ஆகியும், இயக்கம் செய்யப்படாமல் ஆயிரக்கணக்கான மூட்டைகள் இருப்பு உள்ளன.

குறிப்பாக தஞ்சாவூா் மாவட்டத்தில் திருவையாறு, தஞ்சாவூா், பாபநாசம், கும்பகோணம், திருவிடைமருதூா், மயிலாடுதுறை மாவட்டத்தில் மயிலாடுதுறை, சீா்காழி ஆகிய பகுதிகளிலும் பெருமளவு மூட்டைகள் தேக்கம் ஏற்பட்டுள்ளது.

திருவாரூா் மாவட்டம் புதூா், வேப்பந்தாங்குடி, குன்னியூா், கோமல் உள்பட பல கொள்முதல் நிலையங்களில் சராசரியாக 10,000 மூட்டைகள் வரை இருப்பு உள்ளன. மாவட்டம் முழுதும் 38 லட்சம் மூட்டைகள் கொள்முதல் நிலையங்களில் இருப்பு உள்ளன.

முறையாக இயக்கம் செய்யப்படாததால் பல நாள்கள் இருப்பு இருந்து, கொள்முதல் நிலையத்திலிருந்து நெல் அனுப்பப்படும்போது பெருமளவுக்கு எடை குறைவு ஏற்படுகிறது. இதற்காக ஒவ்வொரு கொள்முதல் பணியாளா்கள் மீதும் பல்லாயிரக்கணக்கான ரூபாய் இழப்புத் தொகை செலுத்த வேண்டும் என நிா்வாகம் நியாயமற்ற முறையில் நடவடிக்கை மேற்கொண்டு வருகிறது.

இந்த நடவடிக்கையை நிா்வாகம் கைவிட்டு எவ்வளவு நாள்கள் இருப்பு இருந்தது? அந்த நாட்களுக்கு எவ்வளவு எடை குறையுமோ, அந்த எடை குறைவை அனுமதிப்பதற்கு உரிய படிவத்தில் கொள்முதல் பணியாளா்களிடமிருந்து முன்மொழிவுகள் பெற்று, அதை உரிய முறையில் பரிசீலித்து எடை இழப்பு அனுமதி வழங்க வேண்டும். அதுவரை இழப்புத்தொகை நிா்ணயிப்பதை நிா்வாகம் நிறுத்தி வைக்க வேண்டும்.

இனியும் காலம் தாழ்த்தாமல் கொள்முதல் நிலையங்களில் தேங்கியுள்ள மூட்டைகளை முழுமையாக இயக்கம் செய்ய விரைவாக நடவடிக்கை மேற்கொள்ள வேண்டும்.