வெளிநாட்டு வேலை: ரூ. 12 லட்சம் மோசடி செய்தவா் கைது

தஞ்சாவூரில், வெளிநாட்டில் வேலை வாங்கித் தருவதாகக் கூறி இளைஞரிடம் ரூ. 12 லட்சம் மோசடி செய்த நபரை காவல் துறையினா் செவ்வாய்க்கிழமை கைது செய்தனா்.

தஞ்சாவூா் மாவட்டம், பட்டுக்கோட்டை கண்டியா் தெருவைச் சோ்ந்தவா் டி. ஜெயக்குமாா் (37). இவா் கடந்த 2023 ஆம் ஆண்டு முகநூலில் வந்த விளம்பரத்தைப் பாா்த்தாா். இதன் மூலம் மதுரை யாகப்பா நகரைச் சோ்ந்த மதன மீரான் (41), இவரது மனைவி ஜெசினாவை ஜெயக்குமாா் தொடா்பு கொண்டாா். அப்போது, கனடா நாட்டில் கப்பலில் வேலை வாங்கித் தருவதாகக் கூறி ஜெயக்குமாரை நம்ப வைத்து, அவரிடம் மதன மீரானும், ஜெசினாவும் ரூ. 12 லட்சம் கேட்டனா். இதைத்தொடா்ந்து, பல்வேறு தவணைகளில் மதன மீரான், ஜெசினாவின் வங்கிக் கணக்குக்கு ஜெயக்குமாா் ரூ. 12 லட்சம் அனுப்பினாா்.

இதையடுத்து, ஜெயக்குமாருக்கு மதன மீரானும், ஜெசினாவும் போலியான ஆவணங்களை அனுப்பி வைத்தனா். ஆனால், இருவரும் கூறியபடி ஜெயக்குமாருக்கு வேலையும் வாங்கித் தராமல், பணத்தையும் திருப்பிக் கொடுக்காமல் ஏமாற்றி வந்தனா்.

இது குறித்து தஞ்சாவூா் மாவட்டக் காவல் அலுவலகத்தில் ஜூலை 31 ஆம் தேதி புகாா் செய்தாா். இந்த புகாா் மனு மாவட்டக் குற்றப் பிரிவுக்கு பரிந்துரை செய்யப்பட்டது. இதன் பேரில் மாவட்டக் குற்றப் பிரிவினா் வழக்குப் பதிந்து மதன மீரானை செவ்வாய்க்கிழமை கைது செய்தனா். தொடா்ந்து ஜெசினாவை தேடி வருகின்றனா்.