நெசவாளா்களுக்கு எதிா்பாா்த்ததைவிட கூடுதல் போனஸ்: அமைச்சா் கோவி செழியன்

கைத்தறி நெசவாளா்களுக்கு நிகழாண்டில் கூடுதல் போனஸ் வழங்கப்படுகிறது என்றாா் அமைச்சா் கோவி.செழியன்.

தஞ்சாவூா் மாவட்டம், திருபுவனம் பட்டு கைத்தறி நெசவாளா் கூட்டுறவு சங்க உறுப்பினா்கள் போனஸ், டிவிடெண்ட் தொகை வழங்கக் கோரி செவ்வாய்க்கிழமை காத்திருப்புப் போராட்டம் நடத்தினா். இதையறிந்த சட்டப்பேரவை உறுப்பினரும், உயா் கல்வித்துறை அமைச்சருமான கோவி செழியன் கைத்தறித் துறை அமைச்சா் ஆா். காந்தியை சந்தித்துப் பேசிய பின்னா் புதன்கிழமை திருபுவனம் பட்டு கூட்டுறவு சங்கத்துக்கு வந்த அமைச்சா் அங்கு நடைபெற்ற பேரவை பொதுக்கூட்டத்தில் பேசியது:

தமிழகத்திலேயே சிறந்த கைத்தறி நெசவாளா்கள் சங்கமாக திகோ சில்க்ஸ் உள்ளது. இதில் உள்ள நெசவாளா்கள் கேட்ட போனஸை விட (38 சதவிகிதம்) 2 சதவிகிதம் கூடுதலாக 40 சதவிகிதமாக வழங்கப்படுகிறது. டிவிடெண்ட் 14 சதவிகிதம் வழங்கப்படும். தேங்கிக் கிடக்கும் பட்டுப் புடவைகளுக்கு சிறப்புத் தள்ளுபடி வழங்க ஏற்பாடு நடைபெறுகிறது என்றாா்.

கூட்டத்தில், குடந்தை மாநகரத் துணை மேயா் சுப. தமிழழகன், முன்னாள் எம்.பி.ராமலிங்கம், திருவிடைமருதூா் பேரூராட்சித் தலைவா் சுந்தர ஜெயபால், சங்க நிா்வாக இயக்குநா் கிரிதரன் உள்ளிட்டோா் கலந்து கொண்டனா்.