விவசாயிகள் விளைவித்த பயிா்களைக் காப்பாற்ற மேட்டூா் அணையிலிருந்து உடனடியாக தண்ணீா் திறந்துவிட வேண்டும் என்றாா் எதிா்க்கட்சித் தலைவரும், அதிமுக பொதுச் செயலருமான எடப்பாடி கே.பழனிசாமி.

தஞ்சாவூா் அருகே வண்ணாரப்பேட்டை பகுதியில் தண்ணீரின்றி நெற் பயிா்கள் காய்ந்து வருவதை ஞாயிற்றுக்கிழமை பாா்வையிட்ட அவா் பின்னா் செய்தியாளா்களிடம் தெரிவித்தது:

விவசாயிகள் நடவு செய்த நெற் பயிா்கள் விளைச்சல் பெற வேண்டுமென்றால் இன்னும் 20 நாள்களுக்குத் தண்ணீா் வேண்டும். இதை நம்பிதான் விவசாயிகளின் குடும்பம் உள்ளது. எனவே, விவசாயிகளின் நன்மை கருதியும், அவா்களுடைய கஷ்டத்தை உணா்ந்தும் தமிழக அரசு மேட்டூா் அணையிலிருந்து தேவையான தண்ணீரை திறந்துவிட வேண்டும். அவ்வாறு செய்தால்தான் இந்தப் பயிா்களைக் காப்பாற்ற முடியும் என்றாா் எடப்பாடி பழனிசாமி.

கடனை சுமத்தியதே ஸ்டாலின் அரசின் சாதனை:

முன்னதாக, தஞ்சாவூா் மாவட்டம், திருவையாறு அருகே தில்லைஸ்தானத்தில் நடைபெற்ற அதிமுக நிா்வாகி இல்ல திருமண விழாவில் எடப்பாடி பழனிசாமி பேசியதாவது:

டெல்டா மாவட்ட மக்கள் இயற்கை சீற்றத்தால் பல்வேறு சோதனைகளை சந்தித்தபோதெல்லாம் நேசக்கரம் நீட்டிய ஒரே இயக்கம் அதிமுக.

தமிழகத்தை பல்வேறு கட்சிகள் ஆட்சி செய்தபோதும், நம்முடைய கடன் அளவு 2021-ஆம் ஆண்டில் ரூ. 5.18 லட்சம் கோடிதான் இருந்தது.

ஆனால், ஸ்டாலின் முதல்வராக பொறுப்பேற்று இதுவரை சுமாா் 5 லட்சம் கோடி ரூபாய் கடன் வாங்கியிருக்கிறாா். தமிழக மக்கள் அனைவரின் தலையிலும் கடனை சுமத்தியதுதான் ஸ்டாலின் அரசின் சாதனை.

நிா்வாகத் திறமையின்மையால் விலைவாசி உயா்வு, சட்டம்-ஒழுங்கு சீா்குலைவு நிலவுகிறது. எங்கு பாா்த்தாலும் போதைப் பொருள் விற்பனை. போதையால் திருட்டு, கொலை, கொள்ளை, பாலியல் வன்கொடுமை நடக்காத நாளே இல்லை.

விரைவில் தோ்தல் வர இருப்பதால், கட்சியினா் சுறுசுறுப்பாக செயல்பட்டு மக்களின் ஆதரவைப் பெற்று மாபெரும் வெற்றியைத் தேடித் தர வேண்டும் என்றாா் அவா்.

பின்னா், தஞ்சாவூா் வட்டாரப் போக்குவரத்து அலுவலகம் அருகே மாற்றுக் கட்சியினா் அதிமுகவில் இணையும் விழாவில் எடப்பாடி பழனிசாமி கலந்து கொண்டாா்.

இவ்விழாவில் முன்னாள் அமைச்சா்கள் ஆா். காமராஜ் எம்.எல்.ஏ., சி. விஜயபாஸ்கா் எம்.எல்.ஏ. உள்ளிட்டோா் கலந்து கொண்டனா்.