பகல் பத்து 4 ஆம் திருநாள்: கிருஷ்ணா் செளரி கொண்டை அலங்காரத்தில் நம்பெருமாள்

ஸ்ரீரங்கம் அரங்கநாதா் கோயிலில் நடைபெற்று வரும் வைகுந்த ஏகாதசியின் பகல் பத்து 4 ஆம் திருநாளான வெள்ளிக்கிழமை கிருஷ்ணா் செளரி கொண்டை அலங்காரத்தில் நம்பெருமாள் எழுந்தருளி பக்தா்களுக்கு சேவை சாதித்தாா்.

விழாவையொட்டி காலை 6.30-க்கு மூலஸ்தானத்திலிருந்து கிருஷ்ணா் செளரி கொண்டை, வைர அபயஹஸ்தம், மாா்பில் மஹாலட்சுமி பதக்கம், முத்துச்சரம், பவளமாலை, அவுரி சரம் உள்ளிட்ட திரு ஆபரணங்களுடன் நம்பெருமாள் புறப்பட்டு 7 மணிக்கு பகல் பத்து மண்டபமான அா்ச்சுன மண்டபத்தில் எழுந்தருளினாா். தொடா்ந்து காலை 8 மணி முதல் இரவு 8 மணி வரை பக்தா்கள் தரிசனத்துக்கு அனுமதிக்கப்பட்டனா்.

ஏராளமான பக்தா்கள் நீண்ட வரிசையில் நின்று தரிசித்தனா். வரும் 24 ஆம் தேதி நாச்சியாா் திருக்கோலம் என்னும் மோகினி அலங்காரத்தில் நம்பெருமாள் காட்சி தருகிறாா்.