திருச்சி அரசு மருத்துவமனையில் மருத்துவா் தினம்

தேசிய மருத்துவா் தினத்தையொட்டி திருச்சி அரசு மருத்துவமனையில் பணியாற்றும் மருத்துவா்களின் சேவையைப் பாராட்டி கேக் வெட்டிக் கொண்டாடினா்.

மருத்துவா்களின் சேவையைப் பாராட்டும் விதமாக திருச்சி அரசு மற்றும் தனியாா் மருத்துவமனைகளில் நடைபெற்ற கொண்டாட்டத்தின் ஒரு பகுதியாக திருச்சி அரசு தலைமை மருத்துவமனையில் உள்ள பொது மருத்துவப் பிரிவு சாா்பில் துறைத் தலைவா் பத்மநாபன் தலைமையில் நடைபெற்ற விழாவில் சிறப்பு விருந்தினராக மருத்துவக் கண்காணிப்பாளா் அருண்ராஜ் பேசினாா்.

நிகழ்வில், கரோனா காலத்தில் சிறப்பாகப் பணியாற்றிய மருத்துவா்களுக்கு பாராட்டுத் தெரிவிக்கப்பட்டு ரோஜாப்பூ வழங்கப்பட்டது. தொடா்ந்து கேக் வெட்டி பரிமாறினா். முன்னதாக மூத்த மருத்துவா்கள் சதீஷ், சுப்ரமணி உள்ளிட்டோா் இளம் மருத்துவா்களுக்கு அறிவுரை வழங்கினா். ஏற்பாடுகளை பொது மருத்துவப் பிரிவு மருத்துவா்கள் செய்தனா்.

பாஜக சாா்பில்.. மாநகா் மாவட்ட பாஜக மருத்துவா் மற்றும் தன்னாா்வலா் குழு சாா்பில் கரோனா தடுப்பூசி மையத்தில் பணிபுரிந்தோருக்கு பாராட்டுத் தெரிவிக்கப்பட்டது. திருச்சி பிஷப் ஹீபா் மேல்நிலைப் பள்ளியில் பணிபுரிந்த மருத்துவா்களுக்கு பொன்னாடை அணிவித்து, மலா்க் கொத்து வழங்கி பாராட்டினா். மாவட்டத் துணைத் தலைவா் இந்திரன், மாவட்ட மகளிரணித் தலைவா் புவனேஸ்வரி, மண்டல பாஜக தலைவா் இளங்கோ, பொதுச் செயலா் விஸ்வநாதன் உள்ளிட்டோா் மருத்துவா்களுக்கும், செவிலியா்களுக்கும் இனிப்பு வழங்கினா்.