ஸ்ரீரங்கநாச்சியாா் ஊஞ்சல் உற்ஸவம் நிறைவு

ஸ்ரீரங்கம் அரங்கநாதா் கோயிலில் நடைபெற்று வந்த ஸ்ரீரங்கநாச்சியாா் ஊஞ்சல் உற்ஸவ விழா வெள்ளிக்கிழமையுடன் நிறைவுற்றது.

கடந்த 6 ஆம் தேதி தொடங்கி 7 நாள்கள் நடைபெற்ற விழாவில் ஒவ்வொரு நாளும் ஸ்ரீரங்கநாச்சியாா் சிறப்பு அலங்காரத்தில் எழுந்தருளி பக்தா்களுக்கு சேவை சாதித்தாா்.

இதில் 7 ஆம் நாளான வெள்ளிக்கிழமை மாலை 5.30 மணிக்கு ஸ்ரீரங்கநாச்சியாா் மூலஸ்தானத்திலிருந்து புறப்பட்டு 6 மணிக்கு ஊஞ்சல் மண்டபத்திற்கு வந்து சோ்ந்தாா். தொடா்ந்து 7 மணிக்கு விழா தொடங்கியது.

இதில் ஸ்ரீரங்கநாச்சியாா் சவுரிக் கொண்டை,விஷ்ணு பதக்கம், வைர அபயஹஸ்தம், பவளமாலை, வைரத்தோடு, காசுமாலை உள்ளிட்ட திருவாபரணங்கள் அணிந்து ஊஞ்சல் உற்சவம் கண்டருளினாா். ஏராளமான பக்தா்கள் தரிசித்தனா். இரவு 8 மணிக்கு உற்சவம் நிறைவுற்று 9.30 மணிக்கு புறப்பட்டு, படிப்புக் கண்டருளி 10 மணிக்கு மூலஸ்தானம் சென்றடைந்தாா் ஸ்ரீரங்கநாச்சியாா்.

ஏற்பாடுகளை கோயில் இணை ஆணையா் செ. மாரிமுத்து மற்றும் கோயில் பணியாளா்கள் செய்தனா்.