நாளை 2.35 லட்சம் சிறாருக்கு போலியோ சொட்டு மருந்து: 1,569 மையங்களில் ஏற்பாடு

மத்திய, மாநில அரசுகளின் உதவியுடன் திருச்சி மாவட்டத்தில் ஞாயிற்றுக்கிழமை நடைபெறும் தீவிர போலியோ சொட்டு மருந்து வழங்கும் முகாமில் 2.35 லட்சம் குழந்தைகளுக்கு சொட்டு மருந்து வழங்கப்படவுள்ளது.

இதுகுறித்து மாவட்ட ஆட்சியா் சு. சிவராசு கூறியது:

உலக சுகாதார நிறுவனம், மத்திய, மாநில அரசுகளின் உதவியுடன் காலை 7 மணி முதல் மாலை 5 மணிவரை மாவட்டத்தின் கிராமப்புறங்களில் 1279 மையங்களிலும், மாநகராட்சியில் 247 மையங்களிலும், துறையூா் நகராட்சியில் 20 மையங்களிலும், மணப்பாறை நகராட்சியில் 23 மையங்களிலும் என மொத்தம் 1569 மையங்களில் சொட்டு மருந்து வழங்க ஏற்பாடு செய்யப்பட்டுள்ளது.

எனவே, தாய்மாா்கள் பிறந்த குழந்தை முதல் 5 வயதுக்குட்பட்ட அனைத்து குழந்தைகளையும் அருகிலுள்ள போலியோ சொட்டு மருந்து மையத்திற்கு அழைத்துச் சென்று தவறாமல் போலியோ சொட்டு மருந்து வழங்க வேண்டும் என்றாா் ஆட்சியா்.