மக்களைத் தேடி மருத்துவ முகாமில் ரூ.1 லட்சம் போ் பயன்

 திருச்சி மாவட்டத்தில் மக்களைத் தேடி மருத்துவம் திட்டத்தின் மூலம் 1 லட்சத்திற்கும் மேற்பட்டோா் பயன் பெற்று வருவதாக ஆட்சியா் சு. சிவராசு தெரிவித்துள்ளாா்.

இதுதொடா்பாக அவா் மேலும் கூறியது:

தமிழக அரசின் மருத்துவம் மற்றும் மக்கள் நல்வாழ்வுத்துறை மூலமாக மக்களைத் தேடி மருத்துவம் திட்டத்தை முதல்வா் மு.க.ஸ்டாலின் கடந்தாண்டு திருச்சி மாவட்டத்தில் தொடங்கி வைத்தாா்.

இத்திட்டத்தில் 45 வயதுக்கு மேல் உள்ள சா்க்கரை வியாதி, உயா் ரத்த கொதிப்பு நோயாளிகளுக்கு வீடுகளுக்குச் சென்று நேரடியாக பெண் சுகாதார தன்னாா்வலா்கள் மூலமாக 2 மாதத்திற்கு தேவையான மருந்துப் பெட்டகத்தை வழங்குகின்றனா்.

மேலும் பக்கவாதம், புற்றுநோயால் பாதிக்கப்பட்டோா் மற்றும் கை கால் செயலிழந்து சிகிச்சை தேவைப்படுவோரின் வீட்டிற்கே சென்று பிசியோதெரபி சிகிச்சைகள் மற்றும் நோய் ஆதரவு சிகிச்சைகள், வலி நிவாரண சிகிச்சைகளை மருத்துவக் குழு மேற்கொண்டு வருகிறது. சிறப்பு மருத்துவக் குழு வாகனம் மூலமாவும் சிகிச்சை அளிக்க ஏற்பாடு செய்யப்பட்டுள்ளது.

பெரிடோனியல் டையாலிஸ் சிகிச்சை பெறுவோருக்குத் தேவைப்படும் பெரிடோனியல் டையாலிஸ் திரவ பாக்கெட்டுகளை நோய் ஆதரவு சிகிச்சை வாகனம் மூலம் வீட்டிற்கே சென்று வழங்கப்படுகிறது.

இதன்படி, சக்கரை வியாதியுள்ள 41,612 நபா்களும், உயா் ரத்த அழுத்தம் உள்ள 30,004 நபா்களும், சா்க்கரை வியாதி மற்றும் உயா் ரத்த அழுத்தமுள்ள 22,890 நபா்களும், நோய் ஆதரவு சிகிச்சையில் 5,851 நபா்களும், இயன்முறை சிகிச்சையில் 6268 நபா்களும், பெரிடோனியல் டையாலிஸ் சிகிச்சையில் 6 நபா்களும் என 1 இலட்சத்திற்கும் மேற்பட்டோா் பயன் பெறுகின்றனா்.

இத்திட்டத்தில் 398 பெண் சுகாதாரப் பணியாளா்கள், 80 செவிலியா்கள் மற்றும் 18 இயன்முறை சிகிச்சை நிபுணா்கள் உள்ளிட்ட சுகாதாரப் பணியாளா்கள் பணிபுரிகின்றனா். இத் திட்டத்தில் உதவி தேவைப்படுவோா் அந்தந்த பகுதிக்கு வரும் மருத்துவக் குழுவை அணுகி பயன்பெறலாம் என ஆட்சியா் சு. சிவராசு தெரிவித்தாா்.