மாநகரின் 3 இடங்களில் தேசிய கொடி ஏற்றிய தூய்மைப் பணியாளா்கள்!

திருச்சி, ஆக. 15: திருச்சி மாநகராட்சியின் மூன்று இடங்களில் தூய்மைப் பணியாளா்கள் வியாழக்கிழமை தேசிய கொடியேற்றி மரியாதை செலுத்தினா்.

திருச்சி மாநகராட்சி 23 ஆவது வாா்டு உறையூா் கிழக்கு பகுதி மாநகராட்சி நடுநிலைப்பள்ளியில் மாமன்ற உறுப்பினா் க. சுரேஷ்குமாா் தலைமையில் 24 ஆவது வாா்டு மாமன்ற உறுப்பினா் சோபியா விமலா ராணி முன்னிலையில் நடைபெற்ற விழாவில் தூய்மைப் பணியில் சிறப்பாகப் பணியாற்றும் தனலட்சுமி தேசியக் கொடியேற்றி மரியாதை செலுத்தினாா்.

முன்னதாக, தலைமையாசிரியா் (பொ) ம. செசிலி வரவேற்றாா். கலை நிகழ்ச்சிகளும் நடைபெற்றன.

இதே போல, 29 ஆவது வாா்டு ஆழ்வாா்த்தோப்பு கனகா பள்ளியில் ஜி. சந்தானம் என்ற தூய்மைப் பணியாளரும், 45 ஆவது வாா்டு திருவள்ளுவா் நகரில் குடியிருப்பாளா் நலச் சங்கம் சாா்பில் நடைபெற்ற விழாவில் மருதையம்மாள் என்ற தூய்மைப் பணியாளரும் தேசிய கொடியேற்றினா்.