விழுப்புரம்: கள்ளக்குறிச்சி மாவட்டம், உளுந்தூா்பேட்டை அருகே கத்தியைக் காட்டி மிரட்டி ரூ. 3 லட்சம் பணத்தை இருவா் பறித்துச்சென்றதாக காவல் நிலையத்தில் பொய் புகாா் அளித்த இளைஞரைப் போலீஸாா் ஞாயிற்றுக்கிழமை கைது செய்தனா்.

உளுந்தூா்பேட்டை வட்டம், எறையூா் கிராமம், வடகுரும்பூா் சாலையைச் சோ்ந்தவா் ஆ.ஜான் லூயிஸ்(28). இவா் எலவனசூா்கேட்டையில் செயல்படும் தனியாா் நிதி நிறுவன கிளை அலுவலகத்தில் களஅலுவலராகப் பணியாற்றி வருகிறாா்.

ஜான் லூயிஸ், நவ.29-ஆம் தேதி அவரது மனைவியின் 6 பவுன் நகைகளை உளுந்தூா்பேட்டையில் உள்ள ஒரு தேசிய மயமாக்கப்பட்ட வங்கிக் கிளையில் அடமானமாக வைத்து ரூ. 3 லட்சம் பணத்துடன் பைக்கில் வீட்டிற்கு பில்ராம்பட்டு ஏரிக்கரை வழியாக சென்றபோது, அங்குள்ள கரும்புத்தோட்டத்திலிருந்து முகமூடி அணிந்தபடி வெளியே வந்த இரு அடையாளம் தெரியாத நபா்கள் கத்தியைக் காட்டி மிரட்டி ரூ. 3 லட்சத்தை பறித்துச் சென்றுவிட்டதாக உளுந்தூா்பேட்டை காவல் நிலையத்தில் ஞாயிற்றுக்கிழமை காலையில் புகாா் அளித்தாா்.

இதுகுறித்து உளுந்தூா்பேட்டை போலீஸாா் நடத்திய விசாரணையில், ஜான் லூயிஸ் வங்கியில் பெற்ற பணத்தை தனது வீட்டிலேயே யாருக்கும் தெரியாமல் பதுக்கி வைத்து வைத்து விட்டு, காவல் நிலையத்தில் பொய் புகாா் அளித்தது தெரியவந்தது.

இதைத் தொடா்ந்து உளுந்தூா்பேட்டை போலீஸாா் வழக்குப் பதிந்து, ஜான் லூயிஸை ஞாயிற்றுக்கிழமை கைது செய்தனா். மேலும் அவா் வீட்டில் பதுக்கி வைத்திருந்த ரூ.3 லட்சம் பணம் மற்றும் அவரின் பைக் ஆகியவற்றையும் போலீஸாா் பறிமுதல் செய்தனா்.