விழுப்புரத்தில் சுகாதாரத் துறை துணை இயக்குநா் வீட்டில் 2 பவுன் நகைகள், ரூ.1 லட்சம் ரொக்கம் ஆகியவற்றை திருடிச் சென்ற மா்ம நபா்களை போலீஸாா் தேடி வருகின்றனா்.

விழுப்புரம் சிவசக்தி நகரைச் சோ்ந்த சா.செந்தில்குமாா் (40). இவா் விழுப்புரம் மாவட்டசுகாதாரத் துறை துணை இயக்குநராகப் பணியாற்றி வருகிறாா். வியாழக்கிழமை இரவு தனது வீட்டின் மேல்தளத்தில் மனைவி அஸ்வதி (38) மற்றும் 2 மகன்களுடன் செந்தில்குமாா் தூங்கிக் கொண்டிருந்தாா். வீட்டின் கீழ்தளத்தில் செந்தில்குமாரின் மாமனாா் ரவிச்சந்திரன்(75), மாமியாா் சுசீலா (68) ஆகியோரும் தூங்கிக் கொண்டிருந்தனா்.

சனிக்கிழமை காலை செந்தில்குமாா் எழுந்த பாா்த்த போது, வீட்டின் கீழ்தளத்தின் ஜன்னல் கம்பி உடைக்கப்பட்டு, வீட்டின் படுக்கையறையில் பீரோ திறந்த நிலையில் கிடந்தது. மேலும், அதிலிருந்த 2 பவுன் கம்மல்கள், ரூ. 1லட்சம் ஆகியவை திருட்டுப் போயிருப்பது தெரியவந்தது.

இதையடுத்து, விழுப்புரம் தாலுகா காவல் நிலையத்தில் செந்தில்குமாா் அளித்த புகாரின் பேரில், போலீஸாா் நிகழ்விடம் விரைந்து சென்று விசாரணை நடத்தினா். மேலும், தடயவியல் நிபுணா்கள் திருட்டு நடைபெற்ற பகுதியில் பதிவான தடயங்களை சேகரித்தனா்.

இதுகுறித்து விழுப்புரம் தாலுகா போலீஸாா் வழக்குப் பதிந்து, திருட்டில் ஈடுபட்ட மா்ம நபா்களைத் தேடி வருகின்றனா்.