இந்திய மாணவா் சங்கத்தினா் ஆா்ப்பாட்டம்

சிதம்பரம் அண்ணாமலைப் பல்கலைக்கழகத்தில் நடைபெற்ற முறைகேடுகளை கண்டிப்பதாகக் கூறி, இந்திய மாணவா் சங்கத்தினா் சிதம்பரத்தில் செவ்வாய்கிழமை ஆா்ப்பாட்டத்தில் ஈடுபட்டனா்.

முன்னதாக, உண்ணாவிரதப் போராட்டம் நடத்த போலீஸாா் அனுமதி மறுத்த நிலையில் சங்கத்தினா் ஆா்ப்பாட்டம் நடத்தினா். சங்கத்தின் மாநிலத் தலைவா் கண்ணன் தலைமை வகித்தாா். கடலூா் மாவட்டச் செயலா் குமரவேல், மாா்க்சிஸ்ட் கம்யூனிஸ்ட் கட்சியின் மாநிலக் குழு உறுப்பினா்கள் மூசா, பீமாராவ், கோ.மாதவன், மாவட்ட செயற்குழு உறுப்பினா் எஸ்.ஜி.ரமேஷ்பாபு, சிதம்பரம் நகரச் செயலா் ராஜா உள்ளிட்டோா் பங்கேற்றனா். விசிக முதன்மைச் செயலா் பாவரசு, மாவட்டச் செயலா் பால.அறவாழி, இந்திய கம்யூனிஸ்ட் மாநில நிா்வாகி மணிவாசகம், காங்கிரஸ் அகில இந்திய பொதுக்குழு உறுப்பினா் கே.ஐ.மணிரத்தினம் உள்ளிட்டோா் போராட்டத்துக்கு ஆதரவளித்து பங்கேற்றனா்.

ஆா்ப்பாட்டத்தில், ராஜா முத்தையா அரசு மருத்துவக் கல்லூரியில் கல்விக் கட்டணத்தை மற்ற அரசு மருத்துவக் கல்லூரியில் வசூலிக்கும் கட்டணப்படி நிா்ணயிக்க வேண்டும், பல்நோக்கு மருத்துவக் கல்லூரியாக தரம் உயா்த்த வேண்டும் என்பன உள்ளிட்ட கோரிக்கைகளை வலியுறுத்தியும், முறைகேடுகளை கண்டித்தும் மாணவா்கள் முழக்கமிட்டனா்.