ரேஷன் அரிசி கடத்திய இருவா் தடுப்புக் காவலில் கைது

கடலூா் மாவட்டத்தில் ரேஷன் அரிசி கடத்தல் வழக்கில் தொடா்புடைய இருவரை குண்டா் தடுப்புக் காவலில் போலீஸாா் கைது செய்தனா்.

திட்டக்குடி பகுதியிலிருந்து ரேஷன் அரிசி கடத்தப்படுவதாக கடலூா் குடிமைப் பொருள் வழங்கல் மற்றும் குற்றப் புலனாய்வு துறையினருக்கு ரகசிய தகவல் கிடைத்தது. அதன்படி ஆய்வாளா் கல்பனா, உதவி ஆய்வாளா் கவியரசு மற்றும் போலீஸாா் கடந்த 11-ஆம் தேதி கொரக்கவாடி பகுதியில் கண்காணிப்புப் பணியில் ஈடுபட்டனா். அப்போது, ஒரு வீட்டின் முன் நிறுத்தி வைக்கப்பட்டிருந்த வாகனத்தை சோதனையிட்டதில் 102 மூட்டைகளில் தலா 70 கிலோ ரேஷன் அரிசி இருந்தது தெரியவந்தது. இதையடுத்து 7,140 கிலோ ரேஷன் அரிசி மற்றும் வாகனத்தை பறிமுதல் செய்தனா். இதுதொடா்பாக அதே பகுதியைச் சோ்ந்த பச்சைமுத்து மகன் கருப்பையா (25), சுப்பிரமணியன் மகன் பன்னீா்செல்வம் (28) ஆகியோரை கைது செய்தனா். மேலும் தப்பியோடிய ஒருவரை தேடி வந்தனா்.

இந்த நிலையில், ரேஷன் அரிசி கடத்தலில் ஈடுபட்ட இருவரையும் குண்டா் தடுப்புக் காவலில் கைது செய்ய மாவட்ட ஆட்சியருக்கு குடிமைப் பொருள் வழங்கல் மற்றும் குற்றப் புலனாய்வு துறை கண்காணிப்பாளா் ஸ்டாலின் பரிந்துரைத்தாா். அதன்படி, அதற்கான உத்தரவை மாவட்ட ஆட்சியா் கி.பாலசுப்பிரமணியம் வெள்ளிக்கிழமை வெளியிட்டாா்.

இதையடுத்து, ப.கருப்பையா, சு.பன்னீா்செல்வம் ஆகியோரை குண்டா் தடுப்புக் காவலில் ஓராண்டுக்கு சிறையில் வைத்திருப்பதற்கான உத்தரவு கடலூா் மத்திய சிறை நிா்வாகத்திடம் வழங்கப்பட்டது.