ஏ.டி.எம். மோசடி: இளைஞரிடம் விசாரணை

காட்டுமன்னாா்கோவில் பகுதியில் ஏடிஎம் மையத்துக்கு வரும் முதியோருக்கு உதவுவதுபோல நடித்து பண மோசடியில் ஈடுபட்டது தொடா்பாக இளைஞரைப் பிடித்து போலீஸாா் விசாரணை நடத்தி வருகின்றனா்.

கடலூா் மாவட்டம், காட்டுமன்னாா்கோவில் பகுதியில் ஏடிஎம் மையத்துக்கு பணம் எடுக்க வரும் முதியவா்களை குறிவைத்து, அவா்களிடம் பணம் திருடப்படுவதாக போலீஸாருக்கு தொடா்ந்து புகாா்கள் வந்தன. இந்த நிலையில், காட்டுமன்னாா்கோவில் செட்டித்தெரு ஏடிஎம் மையம் அருகே வியாழக்கிழமை சந்தேகத்துக்கு இடமான வகையில் நின்றிருந்த இளைஞரிடம் உதவி ஆய்வாளா் கோ.மதிவாணன் விசாரணை நடத்தினாா். அப்போது அந்த இளைஞா் முன்னுக்குப் பின் முரணாகப் பேசியதால் போலீஸாருக்கு சந்தேகம் ஏற்பட்டது. இதையடுத்து அவரை பிடித்து பைக்கில் காவல் நிலையத்துக்கு போலீஸாா் அழைத்துவந்துகொண்டிருந்தனா். மாவட்ட உரிமையியல் மற்றும் குற்றவியல் நடுவா் நீதிமன்றத்துக்கு அருகே வந்தபோது அந்த இளைஞா் போலீஸாரை தள்ளிவிட்டு தப்பியோட முயன்றாா். ஆனால், அங்கிருந்த பொதுமக்கள் அவரை துரத்திப் பிடித்து போலீஸாரிடம் ஒப்படைத்தனா். பின்னா் அவரை போலீஸாா் காவல்நிலையத்துக்கு அழைத்துவந்து நடத்திய விசாரணையில் ஜெயங்கொண்டம் பகுதியைச் சோ்ந்தவா் என தெரியவந்தது. இவா் ஏடிஎம் மையத்துக்கு வரும் வயதான நபா்களுக்கு பணம் எடுக்க உதவுவதுபோல நடித்து, ஏடிஎம் காா்டை மாற்றிக்கொடுத்து பணம் திருடிவந்தது தெரியவந்ததாம். அவரிடம் போலீஸாா் தொடா்ந்து விசாரணை நடத்தி வருகின்றனா்.