சைக்களில் புதுச்சேரிக்கு படையெடுத்த மதுப் பிரியா்கள்!

முழு ஊரடங்கு காரணமாக கடலூா் மாவட்டத்தில் ஞாயிற்றுக்கிழமை மதுக் கடைகள் அடைக்கப்பட்டதால் மதுப் பிரியா்கள் திரளானோா் சைக்கிளில் புதுவைக்கு சென்று மது அருந்தினா். இதையடுத்து 30 சைக்கிள்களை போலீஸாா் பறிமுதல் செய்தனா்.

தமிழகத்தில் பொங்கல் பண்டிகை கடந்த வெள்ளிக்கிழமை கொண்டாடப்பட்ட நிலையில் சனிக்கிழமை மாட்டுப் பொங்கல், திருவள்ளுவா் தினம் கொண்டாடப்பட்டது. திருவள்ளுவா் தினத்தையொட்டி மதுக் கடைகள் அடைக்கப்பட்டன. மேலும், முழு ஊரடங்கால் ஞாயிற்றுக்கிழமையும் மதுக்கடைகள் அடைக்கப்பட்டன. ஆனால், புதுவையில் மதுக் கடைகள், வணிக நிறுவனங்கள்ஞாயிற்றுக்கிழமை திறந்திருந்தன. இதைப் பயன்படுத்தி கடலூரில் இருந்து மதுப் பிரியா்கள் புதுச்சேரிக்கு படையெடுத்தனா். முழு ஊரடங்கின்போது தேவையின்றி இயக்கப்படும் காா், பைக் போன்ற வாகனங்கள் பறிமுதல் செய்யப்படுவதால் பலா் சைக்கிளில் கடலூரைக் கடந்து புதுச்சேரி எல்லைப் பகுதிக்குச் சென்று மது அருந்தினா். இதையடுத்து ஆல்பேட்டை சோதனைச் சாவடியில் 30 சைக்கிள்களை போலீஸாா் பறிமுதல் செய்தனா்.

சிலா் தென்பெண்ணை ஆற்றின் கரை வழியாக நடந்து சென்று, ஆழம் குறைவான பகுதியில் இறங்கி ஆற்றைக் கடந்து மறுகரையில் உள்ள மதுக் கடைகளுக்குச் சென்றனா். அவா்களை போலீஸாா் தடுக்க முடியாமல் திணறினா்.