ஊராட்சி செயலா்கள் சங்கத்தினா் தபால் அனுப்பும் போராட்டம்

கோரிக்கையை வலியுறுத்தி, கடலூா் மாவட்ட தமிழ்நாடு ஊராட்சி செயலா்கள் சங்கத்தினா் புதன்கிழமை தபால் அனுப்பும் போராட்டத்தில் ஈடுபட்டனா்.

ஊராட்சி செயலா்களை தமிழக அரசின் ஓய்வூதியத் திட்டத்தில் இணைக்க வேண்டும் என்ற ஒற்றைக் கோரிக்கையை நிறைவேற்ற வலியுறுத்தி, அண்மையில் கடலூா் மாவட்ட தமிழ்நாடு ஊராட்சி செயலா்கள் சங்கத்தினா் ஒரு நாள் தற்செயல் விடுப்பு ஆா்ப்பாட்டத்தில் ஈடுபட்டனா்.

இந்த நிலையில், இரண்டாவது கட்டமாக புதன்கிழமை தமிழக முதல்வா், ஊரக வளா்ச்சித்துறை அமைச்சா், கூடுதல் தலைமைச் செயலா், இயக்குநா் ஆகியோருக்கு புதன்கிழமை தபால் அனுப்பும் போராட்டத்தில் ஈடுபட்டனா். அப்போது, அவா்கள் கோரிக்கையை வலியுறுத்தி முழக்கங்களை எழுப்பினா்.

கடலூா், மஞ்சக்குப்பம் தலைமை தபால் நிலையம் அருகே நடைபெற்ற போராட்டத்துக்கு, மாவட்டச் செயலா் வேலவன் தலைமை வகித்தாா். மாவட்ட நிா்வாகிகள் கருணாமூா்த்தி, கண்ணன், திருவேங்கடம், மாநில பொறுப்பாளா்கள் சீதாராமன், ரங்கசாமி, சேகா், வேல்முருகன், ஜெய்சங்கா் உள்ளிட்டோா் கலந்து கொண்டனா்.