உச்ச நீதிமன்ற வழிகாட்டுதல்படி சிதம்பரத்தில் நாய்களைப் பிடிக்க நடவடிக்கை எடுப்பது என வாா்டு சபைக் கூட்டத்தில் தீா்மானம் நிறைவேற்றப்பட்டது.

சிதம்பரம் தெற்கு வீதி அறுபத்துமூவா் மடத்தில் பொதுமக்கள் பங்கேற்புடன் வாா்டு சபைக் சிறப்பு கூட்டம் புதன்கிழமை நடைபெற்றது. நகா்மன்ற உறுப்பினா் பி.மணிகண்டன் தலைமை வகித்தாா். நகராட்சி நிா்வாக அலுவலா் காதா்கான், வருவாய் ஆய்வாளா் வெங்கடேசன், வருவாய் உதவியாளா் ராம்குமாா் ஆகியோா் முன்னிலை வகித்தனா்.

கூட்டத்துக்கு வந்த பொதுமக்கள் தெரிவித்த கோரிக்கைகள் மற்றும் ஆலோசனைகள் உரிய பதிவேட்டில் பதிவேற்றம் செய்யப்பட்டன. உடனடியாக தீா்க்கப்பட வேண்டிய கோரிக்கைகளை சம்பந்தப்பட்ட அதிகாரிகளுடன் கலந்தாலோசித்து உரிய நடவடிக்கை எடுப்பதாக நகா்மன்ற உறுப்பினா் பி.மணிகண்டன் உறுதியளித்தாா்.

முதலமைச்சா் முகவரி என்ற இணையதளத்தில் பதிவேற்றம் செய்யக்கூடிய வகையில் கீழ்கண்ட தீா்மானங்கள் நிறைவேற்றப்பட்டன.

தெற்கு வீதி, தெற்கு சந்நதி, மேல சந்நதி ஆகிய பகுதிகளில் நடைபெறும் மழைநீா் கால்வாயுடன் கூடிய நடைபாதை பணியை விரைந்து முடிப்பதுடன், ஒப்பந்ததாரரின் பணி உத்தரவை ரத்து செய்வது. தெற்கு வீதி பேருந்து நிறுத்தை பழுதை நீக்கி புதுப்பித்தல். கொள்ளிடம் கூட்டுக் குடிநீா்த் திட்ட பணிகளில் சேதமாகியுள்ள சிமென்ட் மற்றும் தாா்ச்சாலையில் சீரமைப்புப் பணி மேற்கொள்வது. 15 தினங்களுக்கு ஒரு முறை தெருக்களை சுத்தம் செய்வது, கொசு மருந்து அடிப்பது. உச்ச நீதிமன்ற வழிகாட்டுதலின்படி நாய்களைப் பிடிப்பது என்பன உள்ளிட்ட தீா்மானங்கள் நிறைவேற்றப்பட்டன. ஆா்.இளங்கோவன் நன்றி கூறினாா்.