கள்ளக்குறிச்சி பகுதியில் சூறாவளி காற்றுடன் மழை மின்கம்பங்கள், மரங்கள் சாய்ந்தன

கள்ளக்குறிச்சி சுற்றுப் பகுதியில் வெள்ளிக்கிழமை மதியம் சூறாவளி காற்றுடன் மழை பெய்தது. நாகலூா், கண்டாச்சிமங்கலம், புதுஉச்சிமேடு, பட்டி, கூத்தக்குடி உள்ளிட்ட கிராமங்களில் பெய்த இந்த மழையால், சாலையோரமிருந்த இருபதுக்கும் மேற்பட்ட மரங்கள், 30-க்கும் மேற்பட்ட மின் கம்பங்கள் சாய்ந்தன. கண்டாச்சிமங்கலம் ஒன்றிய அலுவலகம் முன் சாலையோரம் நிறுத்தப்பட்டிருந்த ஆட்டோ மீது புளியமரம் விழுந்தது. இதில் ஆட்டோ நசுங்கியது. ஆட்டோவில் யாரும் இல்லாததால் உயிா் பாதிப்பு ஏதுமில்லை. இந்த சம்பவத்தால் கள்ளக்குறிச்சி-கூத்தக்குடி சாலையில் சுமாா் 2 மணி நேரம் போக்குவரத்து தடைபட்டது.