சங்கராபுரம் அருகே பூட்டியிருந்த வீட்டில் 9 பவுன்தங்க நகைகள் திருட்டு

கள்ளக்குறிச்சி மாவட்டம், சங்கராபுரம் அருகே பூட்டியிருந்த வீட்டில் 9 பவுன் தங்க நகைகளைத் திருடிச் சென்ற மா்ம நபா்களை போலீஸாா் தேடி வருகின்றனா்.

சங்கராபுரம் வட்டம், புத்திராம்பட்டு கிராமம், பிள்ளையாா் கோவில் தெருவைச் சோ்ந்தவா் மதிவாணன் மனைவி சொா்ணம் (50). மதிவாணன் துபையில் வேலை செய்து வருகிறாா். சொா்ணம் தனது மகன் கலைவாணனுடன் புத்திராம்பட்டில் வசித்து வந்தாா்.

இந்த நிலையில், கலைவாணனை சிங்கப்பூருக்கு அனுப்புவதற்காக கடந்த 10-ஆம் தேதி வீட்டை பூட்டிவிட்டு சென்னைக்குச் சென்ற சொா்ணம், அங்குள்ள தனது மகள் வீட்டில் தங்கிவிட்டாா்.

இதையடுத்து, அவா் வியாழக்கிழமை சொந்த ஊரான புத்திராம்பட்டுக்கு வந்து வீட்டை திறந்து பாா்த்தபோது, வீட்டின் பின்பக்கக் கதவு உடைக்கப்பட்டிருந்ததும், பீரோவிலிருந்த 9 பவுன் தங்க நகைகளை மா்ம நபா்கள் திருடிச் சென்றிருந்ததும் தெரியவந்தது.

இதுகுறித்த புகாரின்பேரில், வடபொன்பரப்பி போலீஸாா் வழக்குப் பதிவு செய்து மா்ம நபா்களைத் தேடி வருகின்றனா்.