மூதாட்டியை கொன்று நகை திருடிய வழக்கு: இளைஞா் கைது

தியாகதுருகம் பேருந்து நிலையத்தில் தூங்கிய மூதாட்டியை தாக்கி கொலை செய்து, 2 தங்க மூக்குத்திகளை திருடிச் சென்ற வழக்கில் இளைஞரை போலீஸாா் புதன்கிழமை கைது செய்தனா்.

தியாகதுருகம் ராஜீவ்காந்தி நகா் பகுதியைச் சோ்ந்த சுப்பிரமணியன் மனைவி ரங்கநாயகி (86). இவா், கடந்த 14-ஆம் தேதி தியாகதுருகம் பேருந்து நிலையத்தில் தலை, மூக்கில் ரத்த காயங்களுடன் மூக்கு அறுந்த நிலையில் உயிரிழந்து கிடந்தாா்.

இதுகுறித்து தகவலறிந்த தியாகதுருகம் போலீஸாா் ரங்கநாயகியின் சடலத்தை மீட்டு, உடல்கூறாய்வுக்காக கள்ளக்குறிச்சி அரசு மருத்துவக் கல்லூரி மருத்துவமனைக்கு அனுப்பி வைத்தனா். மேலும், இதுகுறித்த புகாரின்பேரில் போலீஸாா் வழக்குப் பதிவு செய்தனா்.

இந் நிலையில், தியாகதுருகம் காவல் ஆய்வாளா் நா.மலா்விழி, குற்றப்பிரிவு காவல் உதவி ஆய்வாளா் ரா.ஆனந்தராசு ஆகியோா் தலைமையிலான போலீஸாா் தியாகதுருகம் பேருந்து நிலைய பகுதியில் புதன்கிழமை விசாரணை மேற்கொண்டனா். அப்போது, தியாகதுருகம் மலையம்மன் கோவில் பகுதியில் சந்தேகப்படும்படியாக ஒருவா் படுத்து தூங்கிக்கொண்டிருப்பதாக தகவல் கிடைத்தது.

இதையடுத்து அங்கு சென்ற போலீஸாா், அந்த நபரிடம் விசாரித்தபோது, சின்னசேலம் வட்டம், நல்லாத்தூா் கிராமத்தைச் சோ்ந்த அங்கமுத்து மகன் சுரேஷ் (39) என்பதும், அவா் தற்போது தியாகதுருகத்தை அடுத்த மேட்டுக்குப்பம் பகுதியில் 2-ஆவது மனைவி மூக்காயியுடன் வசித்து வருவதும் தெரியவந்தது.

சுரேஷ் கடந்த 14-ஆம் தேதி தியாகதுருகம் பேருந்து நிலையத்தில் தூங்கிய ரங்கநாயகியிடம் தங்க மூக்குத்திகளை திருட முயன்ற நிலையில், அவா் தடுத்ததால் மூக்குத்தியை பிடித்து இழுத்தபோது, மூக்கு கிழிந்ததாம். பின்னா், ரங்கநாயகியின் தலைமுடியை பிடித்து தூக்கி தரையில் முட்டியதில் ரத்த காயம் ஏற்பட்டு அவா் நிகழ்விடத்திலேயே உயிரிழந்துவிட்டதாக சுரேஷ் போலீஸாரிடம் தெரிவித்தாராம்.

இதையடுத்து, அவரை கைது செய்த போலீஸாா், பிரிதிவிமங்கலம் ஏரிப் பகுதியில் புதைத்து வைத்திருந்த 2 மூக்குத்திகளையும் பறிமுதல் செய்தனா்.

சுரேஷ் மீது கள்ளக்குறிச்சி, சின்னசேலம், தியாகதுருகம் காவல் நிலையங்களில் ஏற்கெனவே திருட்டு வழக்குகள் நிலுவையில் உள்ளன.