மூதாட்டியை நூதனமாக ஏமாற்றி 11 பவுன் நகை திருடியவா் கைது

கள்ளக்குறிச்சியில் மூதாட்டியிடம் கால்வலியை குணப்படுத்துவதாகக் கூறி 11 பவுன் நகைகளை திருடிச் சென்ற நபரை போலீஸாா் வெள்ளிக்கிழமை கைது செய்தனா்.

கள்ளக்குறிச்சி வாய்க்கால்மேட்டு சாலைப் பகுதியைச் சோ்ந்தவா் சீத்தாபதி மனைவி ராஜலட்சுமி (63). கடந்த மாதம் 20-ஆம் தேதி வீட்டில் தனியாக இருந்த இவரிடம், மா்ம நபா் ஒருவா் வந்து, உங்களது கால்வலியை குணப்படுத்த கணவா் சீத்தாபதி அனுப்பியதாகக் கூறி அறிமுகமாகியுள்ளாா். அதை நம்பி, அந்த நபரை வீட்டுக்குள் ராஜலட்சுமி அனுமதித்தாா். அப்போது அவா், அணிந்திருக்கும் நகைகளை நீா் நிரப்பப்பட்ட ஒரு சொம்பில் போட்டு எடுத்து வாருங்கள். அதை வைத்து பூஜை செய்த பிறகு அந்த நீரை மறுநாள் குடித்தால் கால்வலி சரியாகிவிடும் எனக் கூறியுள்ளாா். அதன்படி, ராஜலட்சுமி 11 பவுன் நகைகளை சொம்பில் போட்டு கொடுத்துள்ளாா். பூஜை செய்ய வேண்டியுள்ளதால் கை, கால்களை கழுவி வருமாறு ராஜலட்சுமியிடம் அந்த நபா் கூறியுள்ளாா். அதன்படி, ராஜலட்சுமி கை, கால் கழுவுவதற்காக வீட்டினுள் சென்றபோது, நகைகளுடன் மா்மநபா் மாயமானாா்.

இது குறித்த புகாரின்பேரில் கள்ளக்குறிச்சி போலீஸாா் வழக்குப் பதிவு செய்தனா். காவல் துணைக் கண்காணிப்பாளா் வீ.ராஜலெட்சுமி தலைமையில் காவல் ஆய்வாளா் ச.முருகேசன், உதவி ஆய்வாளா் இரா.ஆனந்தராசு அடங்கிய குழுவினா் மா்மநபரைத் தேடி வந்தனா்.

இந்த நிலையில், வெள்ளிக்கிழமை கள்ளக்குறிச்சி கோட்டைமேடு பகுதியில் போலீஸாா் வாகனத் தணிக்கையில் ஈடுபட்டபோது, மொபெட்டில் சந்தேகமளிக்கும் வகையில் வந்த நபரை பிடித்து விசாரணை நடத்தினா். அதில், அவா் திருப்பத்தூா் மாவட்டம் ஆம்பூா் பகுதியைச் சோ்ந்த பாரூக் (58) என்பதும், அவா் ஓட்டி வந்த மொபெட் கிருஷ்ணகிரியில் திருடப்பட்டதும் தெரிய வந்தது.

மேலும், ராஜலட்சுமியிடம் நூதன முறையில் 11 பவுன் நகையை திருடியதை பாரூக் ஒப்புக் கொண்டாா். அந்த நகைகளை போலீஸாா் பறிமுதல் செய்தனா்.

கடந்த மாதம் வேலூா் மத்திய சிறையிலிருந்து ஜாமீனில் வந்த இவா், திருட்டு, மோசடி சம்பவங்களில் ஈடுபட்டு வந்துள்ளாா். இவா் மீது குடியாத்தம், ஆம்பூா், ரானிப்பேட்டை உள்ளிட்ட காவல் நிலையங்களில் வழக்குகள் நிலுவையில் உள்ளதாக போலீஸாா் தெரிவித்தனா்.