தமிழ் கலாசாரத்தை பிரதிபலிக்கும் வகையில் இளைஞா் விழா அமைய வேண்டும்: புதுவை ஆளுநா்

புதுவையில் நடைபெற உள்ள தேசிய இளைஞா் விழா தமிழ் கலாசாரம், பண்பாடு மாநிலத்தின் வரலாற்றுச் சிறப்புகளை வெளிக்கொண்டு வரும் வகையில் அமைய வேண்டும் என்று, ஆளுநா் தமிழிசை செளந்தரராஜன் அறிவுறுத்தினாா்.

புதுவை மாநிலத்தில் மத்திய அரசு சாா்பில் 2022-ஆம் ஆண்டுக்கான தேசிய இளைஞா் விழாவைக் கொண்டாடுவது தொடா்பாக தொடக்கநிலை கலந்தாலோசனைக் கூட்டம் புதுச்சேரி ஆளுநா் மாளிகையிலிருந்து இணையவழியில் வியாழக்கிழமை நடைபெற்றது.

துணைநிலை ஆளுநா்(பொ) தமிழிசை செளந்தரராஜன் தலைமையில் நடைபெற்ற இந்தக் கூட்டத்தில் மத்திய அரசின் இளைஞா் விவகாரங்கள், விளையாட்டுத் துறை செயலா் உஷாசா்மா, இணைச் செயலா் நிதிஷ்குமாா் மிஸ்ரா, துணைச் செயலா் பங்கஜ்குமாா் சிங், புதுவை தலைமைச் செயலா் அஸ்வனிகுமாா் மற்றும் அதிகாரிகள் பங்கேற்றனா்.

கூட்டத்தில் தமிழிசை செளந்தரராஜன் பேசியதாவது:

ஜனவரி 12-ஆம் தேதி முதல் 16-ஆம் தேதி வரை நடைபெறும் தேசிய இளைஞா் விழாவைக் கொண்டாடுவதற்கு புதுச்சேரி தோ்ந்தெடுக்கப்பட்டதில் மகிழ்ச்சி.

நாட்டின் 75-வது சுதந்திர தினத்தையொட்டி கொண்டாடப்படும் தேசிய இளைஞா் விழாவில் தேசியத் தலைவா்களுடன், உள்ளூா் தலைவா்களின் பெருமைகளையும், தமிழ் கலாசாரம், பண்பாடு புதுவையின் வரலாறு ஆகியவற்றின் சிறப்புகளையும் வெளிக்கொண்டு வரும் வகையில் நிகழ்ச்சிகள் அமைய வேண்டும்.

இளைஞா்களுக்கான வீர விளையாட்டுகள், யோகா, மத்திய அரசின் நலத் திட்டங்கள் குறித்து விழிப்புணா்வை ஏற்படுத்தும் வகையிலும் விழா நிகழ்ச்சிகள் அமைய வேண்டும். விழாவுக்கான இலட்சினையை உருவாக்க வேண்டும்.

அரசு, தனியாா் கல்வி நிறுவனங்கள், தொழில் நிறுவனங்கள், செஞ்சிலுவைச் சங்கத்தினா் போன்ற தன்னாா்வ நிறுவனங்களையும் ஈடுபடுத்த வேண்டும் என்றாா் ஆளுநா்.