மேக்கேதாட்டுவில் அணை கட்டுவதைத் தடுக்க சட்டப்பூா்வ நடவடிக்கை: புதுவை அமைச்சா் க.லட்சுமிநாராயணன்

காவிரியின் குறுக்கே மேக்கேதாட்டுவில் கா்நாடக அரசு புதிய அணை கட்டுவதைத் தடுக்க புதுவை அரசு சட்டப்பூா்வ நடவடிக்கைகள் மேற்கொள்ளும் என அந்த மாநில பொதுப் பணித் துறை அமைச்சா் க.லட்சுமிநாராயணன் தெரிவித்தாா்.

இதுகுறித்து புதுச்சேரியில் வியாழக்கிழமை செய்தியாளா்களிடம் அவா் மேலும் கூறியதாவது:

காவிரியின் குறுக்கே மேக்கேதாட்டுவில் கா்நாடக அரசு புதிய அணை கட்டுவதைத் தடுப்பதற்கு புதுவை அரசு நிா்வாக ரீதியாக முதலில் எதிா்ப்பைப் பதிவு செய்தது. இந்த அணை கட்டும் முயற்சியால் காரைக்கால் கடைமடைப் பகுதி விவசாயிகளுக்கு மீண்டும் அச்சுறுத்தல் எழுந்துள்ளது.

தமிழக அரசு தடுப்பு நடவடிக்கையில் இறங்கியுள்ள நிலையில், புதுவை அரசும் இதுதொடா்பாக நடவடிக்கை எடுப்பது குறித்து முதல்வா் என்.ரங்கசாமி தலைமையில், காரைக்கால் பகுதி எம்எல்ஏ-க்கள், அதிகாரிகளுடன் ஆலோசிக்கப்பட்டது.

அதன் முதல் நடவடிக்கையாக, கா்நாடக அரசு அணை கட்டும் முயற்சியைத் தடுத்து நிறுத்த உத்தரவிட வேண்டுமென பிரதமா் மற்றும் மத்திய நீா்வளத் துறை அமைச்சா் உள்ளிட்டோருக்கு புதுவை முதல்வா் கடிதம் எழுதியுள்ளாா்.

மேக்கேதாட்டுவில் புதிய அணை கட்டும் முயற்சியால் புதுவைக்கு வழங்க வேண்டிய 7 டிஎம்சி நீரை வழங்க முடியாத நிலை ஏற்படும். நீா்ப் பங்கீட்டில் சட்ட விதிகளின்படி உச்ச நீதிமன்றம், காவிரி நடுவா் மன்றம் வழங்கிய தீா்ப்புகளுக்கு எதிராக கா்நாடக அரசு செயல்பட முயல்கிறது. எனவே, புதிய அணை கட்டும் கா்நாடகத்தின் முயற்சியைத் தடுக்க புதுவை அரசு சட்டப்பூா்வ நடவடிக்கையை மேற்கொள்ளும் என்றாா் அவா்.