புதுவை முன்னாள் முதல்வா் நாராயணசாமிக்கு கரோனா

புதுவை முன்னாள் முதல்வா் வே.நாராயணசாமிக்கு கரோனா தொற்றிருப்பது சனிக்கிழமை உறுதி செய்யப்பட்டது. இதையடுத்து, வீட்டிலேயே அவா் தன்னை தனிமைப்படுத்திக் கொண்டாா்.

புதுவையில் கரோனா தொற்று வேகமாகப் பரவி வருகிறது. நாள்தோறும் ஆயிரத்துக்கும் மேற்பட்டவா்கள் பாதிக்கப்பட்டு வருகின்றனா். இந்த நிலையில், முன்னாள் முதல்வா் நாராயணசாமிக்கு கடந்த சில நாள்களாக உடல் நலக் குறைவு ஏற்பட்டது.

இதைத் தொடா்ந்து, அவா் சனிக்கிழமை கரோனா பரிசோதனை செய்து கொண்டாா். இதில், லேசான அறிகுறிகளுடன் தொற்றிருப்பது உறுதியானது. இதையடுத்து, அவரை வீட்டிலேயே தனிமைப்படுத்திக் கொள்ளுமாறு மருத்துவா்கள் அறிவுறுத்தினா்.  மருத்துவா்களின் ஆலோசனைப்படி,  வீட்டிலேயே அவா் தன்னை தனிமைப்படுத்திக் கொண்டாா்.

இதுதொடா்பாக நாராயணசாமி தனது முகநூல், ட்விட்டா் பக்கத்தில் வெளியிட்ட பதிவில் கூறியிருப்பதாவது:

நான் சனிக்கிழமை கரோனா பரிசோதனை செய்து கொண்டதில், லேசான அறிகுறியுடன் தொற்றிருப்பது உறுதி செய்யப்பட்டது. இதையடுத்து, வீட்டிலேயே என்னைத் தனிமைப்படுத்திக் கொண்டேன். என்னுடன் தொடா்பில் இருந்தவா்கள் தனிமைப்படுத்திக் கொண்டு, கரோனா பரிசோதனை செய்து கொள்ள வேண்டும் எனக் குறிப்பிட்டுள்ளாா். 

நாராயணசாமி கடந்த 12-ஆம் தேதி புதுச்சேரி காந்தி நகரில் உள்ள வேலைவாய்ப்பு அலுவலகம் எதிரே இளைஞா் காங்கிரஸ் சாா்பில் நடைபெற்ற போராட்டத்தில் கலந்து கொண்டாா்.  ஏற்கெனவே அவா், கரோனா தடுப்பூசி இரு தவணையும் செலுத்திக் கொண்ட நிலையில், கடந்த 13-ஆம் தேதி முன்னெச்சரிக்கை தவணை கரோனா தடுப்பூசியும் செலுத்திக் கொண்டாா் என்பது குறிப்பிடத்தக்கது.