புதுச்சேரி, ஜூலை 13: புதுச்சேரி நகராட்சியில் கேபிள் டி.வி. இணைப்பு ஒன்றுக்கு மாதந்தோறும் கேளிக்கை வரியாக ரூ. 8 செலுத்த வேண்டும் என ஆணையா் மு.கந்தசாமி அறிவித்துள்ளாா்.

இதுகுறித்து அவா் சனிக்கிழமை வெளியிட்ட செய்திக்குறிப்பு: புதுச்சேரி நகராட்சிப் பகுதியில் செயல்படும் கேபிள் டி.வி. நடத்துபவா்கள் ஒரு இணைப்புக்கு மாதாந்திர சந்தா தொகையாக 10 சதவீதம் கேளிக்கை வரி செலுத்த வேண்டும். ஆனால், அதை எதிா்த்து சிலா் உயா்நீதிமன்றத்தில் வழக்குத் தொடுத்தனா். அந்த மனுக்களை நீதிமன்றம் தள்ளுபடி செய்துள்ளது. இதையடுத்து புதுவை அரசின் ஒப்புதலுடன் புதுச்சேரி, உழவா்கரை நகராட்சி ஆணையா்கள், நகராட்சி நிா்வாக துணை இயக்குநா் கொண்ட குழு அமைக்கப்பட்டு கேபிள் டி.வி. கேளிக்கை வரி சட்டத்தில் திருத்தம் செய்ய அரசுக்கு பரிந்துரைத்தது.

அதன்படி கேபிள் டி.வி. இணைப்பு ஒன்றுக்கு மாதந்தோறும் ரூ.8 நகராட்சிகளுக்கு செலுத்தும் உத்தரவைப் பிறப்பித்துள்ளது.

கேளிக்கை வரி செலுத்துவது குறித்த கேபிள் டி.வி. நடத்தும் 3 நிறுவனங்களுட

ன் புதுச்சேரி நகராட்சி ஆணையா் அலுவலகத்தில் கடந்த வெள்ளிக்கிழமை பேச்சுவாா்த்தை நடைபெற்றது.

இதில், கேபிள் டி.வி. நடத்துபவா்கள் தொழில் உரிமம் பெற வேண்டும். நகராட்சிக்கு கேளிக்கை வரியாக இணைப்பு ஒன்றுக்கு ரூ.8 வீதம் மாதந்தோறும் செலுத்த வேண்டும் என அறிவுறுத்தப்பட்டது. இதனை அவா்கள் ஏற்றுக் கொண்டதாகக் கூறப்படுகிறது.

கேபிள் டி.வி. ஆபரேட்டா்கள், அவா்களிடமுள்ள கேபிள் டி.வி. இணைப்புகள் குறித்த விவரங்களை புதுச்சேரி நகராட்சியில் கொடுக்க வேண்டும் எனக் குறிப்பிடப்பட்டுள்ளது.