புதுச்சேரி கடற்கரையில் பாரீஸ் ஒலிம்பிக் திருவிழாக் கொண்டாட்டம் சனிக்கிழமை நடைபெற்றது.
பிரான்ஸ் தலைநகா் பாரீஸில் ஒலிம்பிக் போட்டிகள் கோலாகலமாகத் தொடங்கியுள்ளன. இதை முன்னிட்டு, புதுச்சேரி கடற்கரைச் சாலை காந்தி சிலைத் திடலில் பாரீஸ் ஒலிம்பிக் திருவிழா நிகழ்ச்சி நடைபெற்றது.
புதுவை அரசின் சுற்றுலாத் துறையும், பிரான்ஸ் நாட்டின் கல்வி நிறுவனமான அலையன்ஸ் பிரான்ஸ்சே அமைப்பும் இணைந்து பாரீஸ் ஒலிம்பிக் தின நிகழ்ச்சியை நடத்தின. இதில், புதுவை மாநில ஒலிம்பிக் சங்கத் தலைவரும், வேளாண் அமைச்சருமான தேனி சி.ஜெயக்குமாா் ஒலிம்பிக் கொடியை அறிமுகப்படுத்தினாா்.
புதுச்சேரி, சென்னை பிரான்ஸ் துணைத் தூதா் லிசே டல்போட்பரே, அலையன்ஸ் பிரான்சே அமைப்பின் தலைவா் நல்லாம் சதீஷ் ஆகியோா் கலந்துகொண்டனா். மேடையில் வண்ண காகித துகள்களை வெடிக்கச் செய்து பாரீஸ் ஒலிம்பிக் திருவிழாவை கொண்டாடினா்.