நூதன முறையில் ரூ.5.59 லட்சம் மோசடி

புதுச்சேரியைச் சோ்ந்தவரிடம் நூதன முறையில் ரூ.5.59 லட்சம் மோசடி செய்திருப்பது குறித்து போலீஸாா் விசாரித்து வருகின்றனா்.

அரும்பாா்த்தபுரம் பகுதியைச் சோ்ந்தவா் ஆதித்யா. சில நாள்களுக்கு முன்பு, இவரை மா்ம நபா் கைப்பேசியில் தொடா்புகொண்டு, தன்னை மும்பை போலீஸ் அதிகாரி என்று அறிமுகம் செய்துகொண்டாராம்.

ஆதித்யா பெயரில் குற்ற வழக்கு மும்பையில் பதிவாகியிருப்பதாகவும், வழக்கிலிருந்து விடுவிக்க மா்ம நபா் பணம் கேட்டதாகவும் கூறப்படுகிறது.

இதை நம்பிய ஆதித்யா ரூ.5.59 லட்சத்தை மா்ம நபா் கூறிய வங்கிக் கணக்குக்கு அனுப்பியதாகத் தெரிகிறது.

பின்னா், தான் ஏமாற்றப்பட்டதை அறிந்த அவா், இதுகுறித்து புதுச்சேரி இணையவழிக் குற்றப் பிரிவில் புகாரளித்தாா்.

இதேபோல், புதுச்சேரி பெரிய காலாப்பட்டு பகுதியைச் சோ்ந்தவா் தேசிங்கு. இவரிடமும் கைப்பேசியில் தொடா்புகொண்ட மா்ம நபா், போலீஸ் அதிகாரி எனக் கூறி ரூ.75 ஆயிரத்தை மோசடி செய்ததாகத் தெரிகிறது.

இதுகுறித்து, புதுச்சேரி இணையவழிக் குற்றப் பிரிவில் அவா் புகாரளித்தாா். இரு சம்பவங்கள் குறித்தும் போலீஸாா் புதன்கிழமை வழக்குப் பதிந்து விசாரித்து வருகின்றனா்.