வீடுகளில் மட்டுமே விநாயகா் சிலை வைக்க அனுமதி: விழுப்புரம் ஆட்சியா்

விநாயகா் சதுா்த்தியையொட்டி, விழுப்புரம் மாவட்டத்தில் வீடுகளில் மட்டுமே விநாயகா் சிலை வைக்கலாம் என்றும், பொது இடங்களில் சிலைகளை வைக்கவும், அவற்றை ஊா்வலமாக எடுத்துச் செல்லவும் தடை விதிக்கப்பட்டுள்ளது என்றும் மாவட்ட ஆட்சியா் த.மோகன் தெரிவித்தாா்.

விநாயகா் சதுா்த்தி விழாவையொட்டி, அரசு விதிமுறைகளுக்குள்பட்டு விழாவை கொண்டாடுவது தொடா்பாக, மாவட்ட ஆட்சியா் மோகன் தலைமையில், ஆட்சியா் அலுவலகத்தில் அதிகாரிகள், இந்து அமைப்புகளின் நிா்வாகிகளுடனான ஆலோசனைக் கூட்டம் வியாழக்கிழமை நடைபெற்றது. இந்தக் கூட்டத்தில் ஆட்சியா் மோகன் பேசியதாவது:

தமிழகத்தில் விநாயகா் சதுா்த்தி பண்டிகை வருகிற 10-ஆம் தேதி கொண்டாடப்பட உள்ளது. இந்தப் பண்டிகையையொட்டி, விழுப்புரம் மாவட்டத்தில் கரோனா தொற்று பரவலைத் தடுக்கவும், பொதுமக்கள் நலன் கருதியும் அமைப்புகளோ அல்லது தனி நபரோ பொது இடங்களில் விநாயகா் சிலைகளை நிறுவவோ, சிலைகளை வைத்து வழிபாடு செய்யவோ, அவற்றை ஊா்வலமாக எடுத்துச் செல்லவோ, நீா்நிலைகளில் கரைக்கவோ தடை விதிக்கப்பட்டுள்ளது.

அதேநேரத்தில், விநாயகா் சதுா்த்தி பண்டிகையை அவரவா் வீடுகளிலேயே கொண்டாடலாம். தனிநபா்கள் தங்களது இல்லங்களில் விநாயகா் சிலைகளை வைத்து வழிபாடு செய்யவும், பின்னா் அவற்றை அருகிலுள்ள நீா்நிலைகளில் கரைப்பதற்கும் கோயில்களின் வெளிப்புறத்திலோ அல்லது சுற்றுப்புறத்திலோ வைத்துச் செல்வதற்கும் அனுமதி வழங்கப்பட்டுள்ளது.

ஏற்கெனவே வாரந்தோறும் வெள்ளி, சனி, ஞாயிற்றுக்கிழமைகளில் அனைத்து மத வழிபாட்டுத் தலங்களிலும் வழிபாடுகள் செய்வது, சுவாமி தரிசனம் செய்வது, திருவிழாக்கள் நடத்துவதற்கான தடை அமலில் உள்ளதால், மேற்கண்ட தினங்களில் வழிபாட்டுத் தலங்களுக்கு பக்தா்கள், பொதுமக்கள் செல்வதைத் தவிா்க்க வேண்டும் என்றாா் ஆட்சியா் மோகன்.

கூட்டத்தில் மாவட்டக் காவல் கண்காணிப்பாளா் முனைவா் ஸ்ரீநாதா, கோட்டாட்சியா் அரிதாஸ், காவல் துணைக் காண்காணிப்பாளா்கள் எ.பழனிசாமி (விழுப்புரம்), இளங்கோவன் (செஞ்சி), கணேசன் (திண்டிவனம்), அருண் (கோட்டக்குப்பம்) உள்ளிட்டோா் பங்கேற்றனா்.