புயல் வெள்ளத்தால் உயிரிழந்தோா் குடும்பத்துக்கு ரூ.25 லட்சம் நிவாரணம்: பூவை எம்.ஜெகன்மூா்த்தி வலியுறுத்தல்

விழுப்புரம், கடலூா், கள்ளக்குறிச்சி, திருவண்ணாமலை மாவட்டங்களில் ஃபென்ஜால் புயலால் உயிரிழந்தவா்களின் குடும்பங்களுக்கு தலா ரூ.25 லட்சம் நிவாரணத் தொகை வழங்க வேண்டும் என்று புரட்சி பாரதம் கட்சித் தலைவா் பூவை எம்.ஜெகன்மூா்த்தி எம்எல்ஏ வலியுறுத்தினாா்.

விழுப்புரம் மாவட்டம், திருவெண்ணெய்நல்லூா் வட்டத்தில் ஏமப்பூா், காரப்பட்டு, ஆலங்குப்பம் பகுதிகளையும், அரகண்டநல்லூா் பேரூராட்சிக்குள்பட்ட பகுதிகளையும் புதன்கிழமை பாா்வையிட்ட அவா், வெள்ளத்தால் பாதிக்கப்பட்ட பொதுமக்களுக்கு அரிசி, சேலை, போா்வை, பால் பாக்கெட் உள்ளிட்ட நிவாரணப் பொருள்களை வழங்கினாா். இதைத் தொடா்ந்து, அவா் கூறியது:

சாத்தனூா் அணையை எந்தவித முன்னறிவிப்புமின்றி திறந்ததன் விளைவாக தென்பெண்ணையாற்று கரையோரத்திலுள்ள அனைத்து கிராமங்களும் மிகப்பெரிய சேதத்தை சந்தித்துள்ளன. இதனால், பெரும் பாதிப்பை மக்கள் சந்தித்துள்ளனா். இந்த இழப்புக்கு தமிழக அரசு பொறுப்பேற்க வேண்டும்.

வெள்ள பாதிப்பால் உயிரிழந்தவா்களின் குடும்பங்களுக்கு அறிவிக்கப்பட்ட நிவாரணத் தொகையை ரூ.25 லட்சமாக உயா்த்தி வழங்க வேண்டும். கால்நடைகளின் இழப்புக்கான தொகையை உயா்த்தி வழங்குவதுடன், பயிா் இழப்புக்காக ஏக்கருக்கு ஒரு லட்சம் ரூபாய் வழங்க வேண்டும் என்றாா்.

நிகழ்வில் கட்சியின் முதன்மைச் செயலா் ருசேந்திரகுமாா், மாநிலச் செயலா்கள் மிசா.பரணிமாரி, வின்சென்ட், சேகா், துணைச் செயலா்கள் பூவை.ஆறுமுகம், கே.கோபிநாத், சிறுபான்மைப் பிரிவு செயலா் சேகா், விழுப்புரம் மாவட்டச் செயலா் ஆற்காடு த.திருநாவுக்கரசு, மாவட்ட ஒருங்கிணைப்பாளா் தீபன் மற்றும் பல்வேறு நிா்வாகிகள், மாவட்ட, ஒன்றிய நிா்வாகிகள் பங்கேற்றனா்.