பூமாலை வணிக வளாக கடைகளை வாடகையில் பெற விண்ணப்பிக்கலாம்

விழுப்புரத்தில் உள்ள பூமாலை வணிக வளாக கடைகள் தகுதிவாய்ந்த மகளிா் குழுக்களுக்கு வாடகைக்கு விடப்படவுள்ளதாக மாவட்ட ஆட்சியா் சி.பழனி தெரிவித்துள்ளாா்.

இதுகுறித்து அவா் புதன்கிழமை வெளியிட்ட செய்திக் குறிப்பு: தமிழக இளைஞா் நலன் மற்றும் விளையாட்டுத் துறை அமைச்சரின் வழிகாட்டுதலின்படி, மாநிலம் முழுவதும் மகளிா் சமூக மற்றும் பொருளாதார மேம்பாடு அடைவதற்காக பல்வேறு நடவடிக்கைகள் எடுக்கப்பட்டு வருகின்றன.

இதன் ஒரு பகுதியாக, மகளிா் சுயஉதவிக் குழுக்களில் உற்பத்தி மற்றும் மதிப்புக் கூட்டுதல் பணி செய்பவா்கள் தங்களது தொழிலை மேம்படுத்தி லாபகரமாக செயல்படுத்திடும் வகையில், மாவட்டந்தோறும் பூமாலை வணிக வளாகங்கள் சீரமைக்கப்பட்டு தமிழக முதல்வரால் திறந்து வைக்கப்பட்டது.

அதன்படி, விழுப்புரம் புதிய பேருந்து நிலையம் அருகிலுள்ள பூமாலை வணிக வளாகக் கடைகள் மாதாந்திர மற்றும் 6 மாத வாடகை அடிப்படையில் மகளிா் சுயஉதவிக் குழுக்களுக்கு வழங்கப்பட்டன. தற்போது இந்தக் கடைகள் சுழற்சி முறையில் தகுதிவாய்ந்த குழுக்களுக்கு வாடகைக்கு வழங்கப்படவுள்ளன. விருப்பமுள்ள மகளிா் சுயஉதவிக் குழுக்கள் தங்களுக்கு அருகிலுள்ள வட்டார திட்ட செயலாக்க அலகின் மேலாளா் அல்லது மாவட்ட மகளிா் திட்ட அலகில் செயல்படும் மாவட்ட வழங்கல் மற்றும் விற்பனை சங்க அலுவலகத்தில் நேரடியாக விண்ணப்பித்து பயனடையலாம் என்று ஆட்சியா் தெரிவித்துள்ளாா்.