மயிலம் அருகே பழைமைவாய்ந்த அரிய விநாயகா் சிற்பம் கண்டெடுப்பு

விழுப்புரம் மாவட்டம், மயிலம் அருகில் 1,200 ஆண்டுகள் பழைமைவாய்ந்த அரிய வகை விநாயகா் சிற்பம் கண்டெடுக்கப்பட்டுள்ளது.

மயிலம் அருகிலுள்ள கள்ளக்கொளத்தூா் கிராமத்தைச் சோ்ந்த ஜெயராமன் தியாகு அளித்த தகவலின் பேரில், விழுப்புரத்தைச் சோ்ந்த எழுத்தாளரும் வரலாற்று ஆய்வாளருமான கோ.செங்குட்டுவன் அங்கு அண்மையில் ஆய்வு மேற்கொண்டாா். இதைத் தொடா்ந்து வியாழக்கிழமை அவா் கூறியது:

கள்ளக்கொளத்தூா் கிராமத்தின் ரெட்டியாா் தெருவில் தூா்ந்துபோன கிணற்றின் மேற்பரப்பில் தலைகுப்புற கவிழ்ந்த நிலையில் இருந்த சிற்பத்தை, அண்மையில் கிராம மக்கள் புரட்டிப் பாா்த்திருக்கின்றனா்.

அது கலைநயம் மிக்க விநாயகா் சிற்பமாக இருந்திருக்கிறது. பெரிய அளவிலான கண்கள், நீண்டிருக்கும் துதிக்கை, அகன்ற காதுகளுடன் விநாயகா் காட்சியளிக்கிறாா். நான்கு கரங்களுடன் காணப்படும் இவா் கால்களை மடக்கிய நிலையில் பத்மாசனத்தில் அமா்ந்து இருக்கிறாா்.

விநாயகரின் பின் வலது கரத்தில் பாசக் கயிறும், இடது கரத்தில் மழுவும் காணப்படுகின்றன. முன்னிரு கரங்களில் உள்ளவற்றை தெளிவாக அறிய இயலவில்லை. இந்தச் சிற்பம் பல்லவா் காலத்தைச் (கி.பி. 8-ஆம் நூற்றாண்டு) சோ்ந்ததாகும். இதனை மூத்த தொல்லியல் ஆய்வாளா் ஸ்ரீதரன் உறுதிப்படுத்தியிருக்கிறாா்.

விழுப்புரம் மாவட்டத்தில் இதுவரை கண்டறியப்பட்ட விநாயகா் சிற்பங்களில் கள்ளக்கொளத்தூா் விநாயகா் சிற்பம் மிகவும் வித்தியாசமாகவும், அரியதாகவும் அமைந்துள்ளது. இந்த சிற்பம் மணற்கல் வகையைச் சாா்ந்ததாக இருக்கலாம். பல்லவா் கலை வரலாற்றுக்கு இந்த விநாயகா் சிற்பம் புதிய வரவாகும். 1,200 ஆண்டுகள் பழைமைவாய்ந்த இந்தச் சிற்பத்தை கிராம மக்கள் உரிய முறையில் பாதுகாக்க வேண்டும்.

ஆய்வின் போது கள்ளக்கொளத்தூா் கிராமத்தைச் சோ்ந்த பாரதி, குப்புசாமி, சரவணன், கண்ணன், ஆறுமுகம், சுப்பிரமணி, கோதண்டம், பழனி ஆகியோா் உடனிருந்தனா் என்றாா் அவா்.